Dialuna atardi e team di Ministerio di Desaroyo Teritorial, Infrastructura y Medio Ambiente, tabatin e grato honor di por a sinta cu Minister Plenipotenciario di Washington sra. Joselin Croes, conhuntamente cu su consehera. Den e reunion sumamente interesante y fructifero aki, e team di Ministerio por a informa y duna presentacion pa loke ta diferente proyecto andando riba diferente tema cu ta conserni Ministerio.
Conhuntamente cu Minister Plenipotenciario di Washington a papia di diferente oportunidadnan pa colaboracion, cu diferente instituto y instancianan na Merca.
Asina sra. Joselin Croes a informa cu pa locual ta temanan: Medio Ambiente y Desaroyo Teritorial, tin hopi oportunidad pa colaboracion y tambe hopi interes den Aruba. Siguramente por indica cu e trabounan di Aruba no a keda sin wordo nota riba plataforma internacionalmente, ya cu instancianan manera world bank y IMF ta hopi interes den e pasonan cu Aruba lo tuma pa locual ta un futuro duradero.
Ministerio a duna informacion no solamente pa locual ta e proyectonan y nan contenido, pero tambe di oportunidadnan y retonan cu Ministerio ta consciente di nan. Conhuntamente a yega na palabracion y sigur lo continua cu e colaboracion y comunicacion estrecho entre Ministerio y e oficina di Minister plenipotenciario. Pa asina por crea proyectonan duradero cu ta beneficia nos Pais, cu enfoke riba un futuro duradero.
