ORANJESTAD – Diasabra dia 5 di april, Prome Minister Mike Eman a haci un bishita na e proyecto “Limpi Limpi” hunto cu ex-Minister di Naturalesa Ursell Arends. E bishita a tuma luga den contexto di e traspaso recien di e Ministerio di Naturalesa, durante cual Arends a duna un splicacion detaya di e diferente programa y iniciativa cu a implementa durante su periodo como minister.
Durante e encuentro, Prome Minister Eman a expresa su aprecio p’e programa “Limpi Limpi”, cual ta sirbi como un alternativa necesario y funcional pa deposita desperdicio, despues di e cera e dump di Parkietenbos. Prome Minister a reconoce e rol crucial di e programa “Limpi Limpi” den e maneho sostenibel di desperdicio residencial, y a elogia e trabao di Ursell Arends pa implementa un solucion practico. Na momento cu e dump a cera, Prome Minister tabatin hopi preocupacion, pero ta reconoce cu ex-Minister Arends a tuma un paso importante pa trece un alternativa positivo. “Ora algo ta bon, mester sigui cu ne!” Eman a bisa.
Di su banda, Ursell Arends a manifesta su satisfaccion cu e gobierno nobo ta scoge pa continua e programa “Limpi Limpi”, facilitando asina un oportunidad gratuito y accesibel pa pueblo por deshaci di nan desperdicio den forma separa. E meta pa tin un Aruba mas limpi y sostenibel no tin color politico y ta un esfuerso comun pa bienestar di nos isla.
Prome Minister Eman a compromete pa sigui den contacto cu ex-Minster Arends, pa haci uzo di su conocemento extenso rib’e tema di naturalesa y medio ambiente. Prome Minister Eman a gradici Serlimar y Bureau City Inspector pa nan esfuerso continuo y dedicacion den e ehecucion di e programa di limpiesa. Finalmente, Prome Minister a indica cu lo sondea e posibilidad pa expande e frecuencia di e proyecto “Limpi Limpi”, reconociendo su gran valor p’e comunidad.
