Tardansa den formacion no por stroba continuacion den gobernacion
Diamars atardi Minister Maduro di Finansa a manda carta pa urgi Presidente di Parlamento pa yama e reunion publico pa trata Presupuesto 2025 mas pronto cu ta posibel.
E mandatario a enfatisa cu hopi trabou a wordo haci e añanan anterior pa asina desde aña 2022 entrega y trata presupuesto di Pais Aruba na tempo, y ta importante pa sigui mantene e disciplina presupuestario aki. Ademas ya caba Parlamento a ricibi contesta riba nan pregunta y tambe a ricibi un nota di cambio, pues Parlamento tin tur informacion pa trata Presupuesto 2025.
Minister Maduro ta splica cu ta importante pa e Presupuesto 2025 por wordo aproba, ya cu sin esaki Gobierno no por cumpli cu su obligacionnan financiero y esaki ta trece problema pa, entre otro, e maneho di pago debe di Pais Aruba.
Por ultimo Minister Maduro ta subraya cu Gobernacion ta continuacion y Aruba no por keda sin un presupuesto aproba djies pasobra formacion ta dura largo.
