No tin discusion cu Aruba a logra Status Aparte danki na Betico
ORANJESTAD— Den su discurso durante Ceremonia Protocolar na Plaza Libertador G.F. Betico Croes na ocacion di celebracion di Dia di Betico, Prome Minister Evelyn Wever-Croes a enfatisa e importancia pa na ningun forma purba cambia historia di Status Aparte di Aruba.
“Cu nos a logra nos Status Aparte, ta danki na Betico, riba esey no tin discusion. Y no ta bon tampoco pa na ningun forma purba cambia e historia aki, pasobra esey lo ta un falta di respet, un traicion contra henter nos pueblo cu a lucha schouder cu schouder cu Betico, esunnan cu a wordo golpia, hasta tira, cu a wordo encarcela, tur esunnan cu a lanta contra opresion cu tabata tin e tempo ey. No lubida cu nos Status Aparte tabata posibel solamente cu e apoyo masal y union den henter nos pueblo. Falsifica historia ta un falta di respet contra tur.
Nos Status Aparte ta un logro di henter nos pueblo lidera magistralmente y strategicamente pa Betico Croes. E liderazgo di Betico Croes tabata autentico, di un Arubiano kende tabata dirigi su pueblo, cu hopi fervor.
Clave den esaki tabata union, union di e pueblo Arubano, sin distincion di rasa, color, religion, status social etc. Betico tabata hopi enfatico den esaki cu su palabranan “Arubiano no ta solamente esun cu a nace na Aruba, Arubiano ta tambe esun cu a haci di Aruba su hogar”.
Y pa por logra e union aki y consecuentemente e libertad constitucional, Betico como e gran arkitecto y lider visionario a percura primeramente pa Aruba haya su propio himno y bandera, simbolonan di union y libertad.
E lucha pa nos libertad a culmina durante e Conferencia di Mesa Rondo na maart 1983 na Hulanda, caminda Aruba bao liderazgo di Betico Croes a logra su Status Aparte, esta un pais autonomo den Reino Hulandes cu su propio Gobierno, propio Parlamento, propio Gobernador, propio moneda y propio instrumentonan economico pa desaroya nos pais exitosamente. Esaki ta e bunita legado, e rikesanan inmaterial cu Betico Croes a laga atras pa e generacion aki y futuro generacionnan caminda e mes a yega di declara cu “Mi sa cu despues cu nos no t’ey mas, historia lo demostra kico ta e rikesa inmaterial cu nos a laga atras pa nos criaturanan”.
Su palabranan legendario “Si mi cay na caminda, gara e bandera y sigui cu e lucha” awe ainda ta resona, y ta palabranan cu por a bin solamente di un visionario, y di un persona cu mester tabata sa cu su estadia riba e mundo aki lo tabata cortico. Cu e palabranan aki el a pidi cada un di nos pa nunca, nunca laga e libertad cu nos ta goza di dje, bay perdi. Si mi wak bek, desde cu Betico a fayece pa awor, 39 aña e aña aki, mi ta sigur cu Betico lo ta hopi orguyoso pa mira con nos cada un a gara e bandera, y sigui cu e lucha di hiba nos pais padilanti.
No ta por nada instancianan manera IMF ta bisa cu Aruba su recuperacion despues di pandemia ta “impresionante”. Esaki ta danki na e lucha di cada cuidadano di nos pais.
Durante e siman prome cu Dia di Betico, mescos cu otro añanan, nos a bishita varios scol na Aruba relaciona cu e celebracion di Dia di Betico y mi ta orguyoso di a experencia con e alumnonan di e diferente scolnan aki ta balora e trabounan inmenso eherce pa Betico, y ta mustra nan stimacion p’e mediante canto, poesia, pintura y obranan di arte.
Pa esaki mi kier gradici e maestro y maestranan cu ta traha asina duro den enseñansa, y ta percura pa e historia di Betico Croes y nos Status Aparte no bay perdi”, Prome Minister a enfatisa.
