“Education is the most powerful weapon which you can use to change the world”.
ORANJESTAD – Diasabra dia prome di februari, Instituto Pedagogico Arubano, IPA ta bay tin nan Open Dag 2025. Prome Minister Evelyn Wever-Croes ta tuma e oportunidad pa invita tur esnan interesa den un carera den enseñansa y Aruba en general, pa asisti na e Open Dag di IPA cual tin e tema “The Influencer Teacher”. Esaki lo tuma luga diasabra 1 di februari di 10:30 am – 1:30 pm na IPA na San Nicolas.
Riba e dia aki IPA ta habri su portanan pa tur persona cu kier descubri mas di e rol crucial y e influencia grandi di maestro den enseñansa. IPA ta desea pa tur hende cu tin e pasion pa bira maestro, bin combersa cu nan laga nan inspira bo. Durante e open dag IPA lo duna informacion di diferente estudio y e bishitantenan lo por participa activamente na actividad cu e docentenan di IPA di diferente area di formacion. Pa mas informacion encuanto e open dag y di IPA en general bishita: www.ipaaruba.com.
“Mi ta invita henter comunidad di Aruba, specialmente tur persona cu ta interesa pa haci un carera den enseñansa, pa asisti na e open dag interesante y importante aki dia 1 di februari proximo. Marca e fecha den bo calendario y probecha di e oportunidad pa haya tur informacion personalmente”, Prome Minister a expresa.
