Thuersten Winklaar ta sali na di dos lugá den kampionato hulandes di bokseo

Den Haag/Kralendijk – Thuersten Winklaar ku su prestashon durante e kampionato hulandes di bokseo peso pisá (heavyweight) djadumingu anochi a logra sali na di dos lugá.
‘Esaki ta un motivashon pa traha mas duru ainda. Mi ta yama danki na Bonaire Boxing Federation i tur hende ku a sostené mi i prinsipalmente mi spònsernan. Sin nan esaki no tabata posibel’, segun Winklaar kende ta hopi agradesido. Aunke e premio prinsipal a keda nèt for di su alkanse, e di dos lugá akí ta un logro pa e deporte di bokseo na Boneiru. Esaki ta konfirmá ku nos isla tin talento ku por kompetí ku e mihónan i ku ta posibel pa partisipá na e tipo di kombatenan akí, ku e ayudo, guia i fondonan adekuá. Bonaire Boxing Federation ke ekspresá su sinsero gratitut na e spònsernan Indebon, Wilca NV, Tung Fong Store i D’Shiri Holding, ku a hunga un ròl krusial den e partisipashon akí.