ORANJESTAD – Diaranson mainta na cede di partido MEP a tuma luga un conferencia di prensa na unda líder di partido, Evelyn Wever-Croes a presenta e programa di gobernacion di partido MEP 2025 – 2029, “Un país resiliente y innovativo”. Lider di partido a indica cu e programa aki a wordo traha door di un grupo di candidato cu ta riba lista di MEP, tanto esnan cu tin hopi tempo den politica y esnan nobo, un grupo di hende y varios otro hende den comunidad cu kier a duna nan contribucion.
Lider di partido a indica cu e programa ta traha cu hopi amor, dedicacion y cu e vision y deseo pa tin un Aruba resiliente y innovativo. E plan aki no ta solamente carga pa e politiconan, pero ta tene cuenta cu e comunidad en su totalidad. E programa ta consisti di 135 pagina, y ta uno hopi ambicioso pero cu metanan concreto y solucionnan factibel. Den e plan aki tambe ta demostra cu cifra con tur meta lo por wordo realisa, poniendo prioridad di tur hende central. Cu esaki nos ta habri e caminda pa futuro pa man den man nos por yega na un miho Aruba.
Awor cu partido MEP a stabilisa pais Aruba, percura pa tin recuperacion economico, y cu tin espacio financiero, ta tempo pa inverti den comunidad. Partido Mep no solamente kier pidi sosten di comunidad sino tambe invitabo pa bo ta parti di e movecion. Ta solamente cu sosten di cada un di boso, nos lo por logra un Aruba cu tanto ta desea.
“MEP pa un Aruba resiliente y innovativo” ta e titulo di e programa y den liñanan grandi tin e siguiente contenido.
Capitulo 1: Ta basa riba e economia di Aruba, cu ta uno resiliente y diversifica pa futuro
Capitulo 2: Reforma di mercado laboral
Capitulo 3: Modernisacion di sistema di siguridad social y bienestar
Capitulo 4: Sigui priorisa desaroyo den area social
Capitulo 5: Innovacion y transformacion di salud
Capitulo 6: Educacion y empoderamento di hubentud
Capitulo 7: Energia renobabel y cambio climático
Capitulo 8: Siguridad nacional y control di frontera
Capitulo 9: Un cadena hudicial resiliente y innova
Capitulo 10: Eficiencia di sector publico y reforma di gobernación
Capitulo 11: Garantisa integridad y transparencia den gobierno
Capitulo 12: Aruba creativo, un movemento pa impulsa arte y cultura na Aruba
Capitulo 13: Garantisa inversionnan y desaroyo continuo den deporte
Capitulo 14: Relacionnan den Reino
Capitulo 15: Finansas publico sostenible
Capitulo 16: 7 punto di prioridad
Na e ultimo pagina tin un presupuesto tentativo pa aña 2025 te cu 2029, na unda ta mustra cu cifras con ta bay paga tur e proyectonan cu a wordo menciona den e capitulonan.
“Manera mi a bisa, e ta un programa hopi ambicioso pero principalmente cu accionnan concreto y realisabel pa asina nos por logra un Aruba resiliente, y innovativo, semper cu bo bienestar como punto di prioridad na prome luga pa henter Aruba” lider di partido a expresa.