Caribe Hulandes, 18 di november 2024 – Dutch Caribbean Cooperation of Airports (DCCA) ta orguyoso pa anuncia un iniciativa innovativo pa di e manera aki baha e Passenger Facility Charges (PFC) for di e islanan ABC (Aruba, Boneiro y Corsou) pa e islanan di Caribe Hulandes. E esfuerso aki ta diseña pa fortalece e conexionnan regional ainda mas, haciendo biahe mas accessibel pa e residentenan y e bishitantenan entre Caribe Hulandes.
Alinea cu e Joint Strategic Plan, e iniciativa aki ta enfatisa e dedicacion di DCCA pa mehora e mobilidad dentro di e region. Door di reduci e PFC na 15$ dollar pa pasahero, e biaheronan lo beneficia di prijs mas barata pa pasashi, y mas cu claro e ahustacion lo refleha claramente den e detayenan di tarifa di e aerolineanan participante. E aerolineanan di Caribe; Divi Divi Air, Z-air y Winair a expresa nan sosten y e Passenger Facility Charges (PFC) lo refleha den e costo di pasashi.
E ehecucion lo ta a base di fase, cuminsando cu Corsou y Boneiro na januari 2025 y Aruba na februari 2025. Lo anuncia e fecha pa ehecucion di Sint Maarten den un fase mas despues. Boneiro cu ya caba ta beneficia di un PFC interinsular mas abou cu $15, no lo incrementa e tarifa aki anualmente. Ta brindando atencion special na e ruta Aruba-Corsou, cu tin hopi trafico, unda ta premira cu e reduccion di gasto lo tin un impacto mas inmediato y significativo.
E iniciativa aki ta e culminacion di dos aña di investigacion y planificacion. Na aña 2023, DCCA a realisa un estudio extenso tocante e flexibilidad di e prijsnan, analisando e relacion entre e costonan di pasashi y e demanda di e pasaheronan. E resultadonan, presenta durante e congreso di DCCA na aña 2023, a confirma e potencial di e tarifanan mas abou pa stimula biahe entre e islanan, locual a bira e fundeshi pa e ahuste strategico aki. Esaki sigui p’un test exitoso na Sint Maarten cu tarifanan mas abou di aeropuerto pa e islanan bisiña Saba y Statia permitiendo biahenan mas barata y accesibel.
“Aeropuertonan ta mas cu djis un porta di entrada, nan ta conexionnan importante cu ta trece nos islanan mas cerca di otro”, asina Jonny Andersen, Presidente di DCCA y CEO di CAP, a expresa. El a continua bisando cu: “Door di reduci e Passenger Facility Charges (PFC), nos kier haci biahe entre e islanan mas accesibel y pagabel pa tur hende. E iniciativa aki no solamente ta fortalece e lasonan entre nos islanan pero tambe ta sostene turismo regional y crecemento economico”.
“Nos ta sumamente satisfecho cu porfin a yega na e logro aki dentro di e Joint Strategic Plan di DCCA estableci na aña 2022. E trabou duro y determinacion di DCCA Action Force liderando e esfuerso aki, a bira finalmente un realidad desde 1 di februari 2025. Esaki ta un stap importante den e direccion di haci pa e biahenan entre e islanan ta mas accesibel, siendo un di e metanan principal di DCCA banda di sostenibilidad y conexion”, asina Barbara Brown, CCO di Aeropuerto di Aruba, a enfatisa.
Ademas di mehora e accesibilidad pa e residentenan y e bishitantenan, DCCA ta anticipa e reduccion aki como un manera pa curasha un colaboracion mas grandi entre islanan, impulsando e industria di turismo mas ainda, e negoshinan chikito y tambe impulsa intercambio cultural den henter e region.
Tocante DCCA
Dutch Caribbean Cooperation of Airports (DCCA) ta uni tur seis aeropuerto denter di Reino Hulandes. Su mision ta pa mehora e calidad di cada aeropuerto mediante asistencia mutuo, e intercambio di conocemento y colaboracion, logrando economia di escala. DCCA ta dedica pa promove e conexion entre e islanan y alabes presenta solucionnan innovativo di transporte aereo pa Caribe Hulandes.
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 76% ta di Merca y Canada, 16% ta di Latino America, 5% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.