E biaha aki nos lo dedica historia na e Semana Santo di 1967, cu a keda marca un fin di siman tristo den cual tres persona a hoga y esun di mas hoben apenas 9 aña. Manera e bieu nan tabata bisa, Bierna Santo no ta dia pa bay lama, pero esaki nan a bay sin sa kiko lo bay pasa cu nan.
Pa e parti di e historia di Barcadera, nos lo uza nomber fictisio, e ruman grandi nos lo yama Yola y e ruman muhe chikito nos lo yama Veronica.
Barcadera: Diabierna 24 di maart 1967, un Bierna Santo, pues un dia liber. Yola un señorita di 15 aña, a dicidi riba e mainta aki pa bay pasa dia na lama cu su rumannan. Di mainta trempan e la prepara su 4 rumannan mas chikito pa nan bay lama cu ne, mirando cu tabata un dia liber y tabata hopi laf na cas.
Nan a bay na e beach na Barcadera, pa nan landa y hunga poco banda di lama, algo pasa di 9’or di mainta Yola (15) y Veronica (9) a wordo acerca pa un homber di 40 aña, kende a invitanan pa subi den un boto, pa probablemente crusa lama y bay rif. Aparentemente e dos muchanan no a mira nada malo den esaki. Pa colmo riba e homber tabata burachi. E homber parce no tabata tin zwembroek of short bisti, pero tabata na jockey banda di lama. Ki relacion e homber aki tabata tin cu e muchanan aki , no ta conoci, e por tabata un amigo di cas, un familiar of djis un homber cu nan a conoce e momento ey na lama, pero sigur no tabata nan tata.
E dos muchanan inocentemente a subi den e boto sin sa cu destino tabata yamando nan. E boto tabata style di un Canoa di solamente ocho pia largo y un pia y mey di hancho y mey pia hundo, eigenlijk e tabata net pa un persona y sigur no tabata apto pa carga tres persona. Segun nos a compronde cu e homber no tabata un hende full mentalmente bon di cabes, riba dje e tabata burachi y na jockey. Mientras cu e dos muchanan a subi den boto e 3 rumannan homber chikito a keda warda na canto riba nan dos rumannan muhe. Tur cos a cuminsa bon, e boto a cuminsa bay direcion zuid. Un poco mas leu di costa e olanan a cuminsa bira mas fuerte y pio temporada di Bierna Santo hopi biaha lama sa ta mas bruto cu normal.
E boto tabata hopi chikito cu di baina un persona por a sinta aden. Lama a cuminsa traha cu e boto y aparentemente door di un maniobra robes e boto a cuminsa janga y a bolter. E dos muchanan a trata na keda wanta na e boto, pio e homber tabata asina burachi cu e no por a yuda e dos muchanan aki, di baina e por a yuda su mes. Na dado momento Veronica di 9 aña a bay den panico y no por a wanta mas, e la cansa y a laga los. Yola cu a mira con su ruman muhe chikito a los y a desaparece den e profundidad di lama tambe a bay den panico, pasobra Yola tampoco no tabata sa landa y no por a salba su ruman chikito. Yola den su desesperacion tambe a laga los y mescos cu su ruman chikito a desaparece den profundidad di e lama blauw scur. Mientras e homber si a keda wanta na e boto. E tragedia aki a sosode den lama entre Aruba Chemicals Industries y Balashi den e lama memey di tera cu e rif.
Na momento cu e boto a bolter, nan a grita asina duro cu te na canto riba e beach unda tabata tin hopi hende sinta por a scucha e gritonan di angustia. Net e dia aki, e legendario sr. Martin Bislip hunto cu su casa y yiunan tambe tabata na lama. Nan tambe a scucha e gritamentonan aki, mesora Bislip a pasa man pa un boto y a bay direccion di e boto cu tabata gebolter y a keda drief riba lama. Na yegada e la bin topa cu e homber so, e homber tabata no solamente burachi, pero ya a cuminsa a cansa di keda wanta na e boto. Nan a logra hise den nan boto y a touw e otro boto trece tera.
E homber yegando canto, a conta cu e kier a hiba e dos muchanan rif, pero e boto a bolter cu nan y e dos muchanan a bay fondo di lama. Mesora nan a avisa polis. Polis a detene e homber pa motibo cu e tabata burachi y tabata tin mester di un cuarto pa e sosega su cansancio di alcohol y no a detene pa motibo cu di su culpa dos mucha a hoga.
Mientras tanto a forma un team di rescate y hopi lihe a drenta den accion pa busca e curpanan di e dos mucha muhe nan. Martin Bislip tambe a forma parti di e team di rescate aki, hunto cu un grupo di sambuyado nan a baha den e profundidad di lama pa busca e curpanan, henter dia nan a busca pero no a bin topa cu e curpanan.
Den careda di 4’or y mey di atardi na momento cu polis a trece e homber back na Barcadera. Nan a bay cu e homber pa asina e mustra nan mas o menos na unda e tragedia a sosode. Manera cu e noticia aki a cuminsa core rond, mirones no tabata falta, e caminda di Barcadera tabata un chaos completo. Un cantidad enorme di mirones a bay na e beach di Barcadera pa mira e trabounan di rescate cu tabata andando, por a mira un cantidad di boto riba lama cu tambe a bin pa yuda busca e curpanan di e dos muchanan.
Te den careda di 6 or y 45 di anochi, nan a logra topa cu e curpanan y asina por a trecenan tera, diasabra 25 di maart e dos muchanan aki a wordo hiba na nan ultimo luga di sosiego.
Diadomingo, Pasco di Resurrecion un otro persona mas a perde su bida.
E biaha aki tabata trata di e homber Giok Kwee, di 26 aña, Giok Kwee, un hoben naci na di Indonesia y di mucha a bay biba na Hulanda. Giok Kwee tabata tin algun luna ta biba na Aruba y tabata traha na Moret & Oudheusden, como assistant Accountant. Diadomingo merdia Giok a bay dal un landa na Dos Playa, e lama tabata mas bruto cu normal. Giok Kwee tabata den compania di algun otro persona y nan a adverti’e cu e lama ta hopi bruto pa no bay landa, pero e no a worry, asina mes e la drenta e lama. Manera e la drenta e lama, e olanan bruto a gar’e y no a lag’e bay mas.
E personanan na canto a mira esaki y mesora a bay rescat’e, cu hopi dificultad nan a logra sak’e for di awa. Mesora a cuminsa dune CPR, pa mira si nan por logra pa e reaciona, pero lamentabelmente nan no a logra. Un rato despues Dokter a yega na e sitio y a constata morto di e Indones hoben aki. E tabata biba riba klip den Julianastraat. Despues cu dokter a constata morto Zepp Wever a busca e curpa y a hiba na e Cas Funeral Zepp Wever. Mesora a cuminsa cu e tramitenan pa manda su restonan mortal pa Hulanda.
Den un weekend 3 persona a perde nan bida den e lama bunita blauw cu ta rondona nos isla, un mucha muher di apenas 9 aña, un damita hoben di 15 y un cabayero hoben di 26 aña. Pa e tempo ey sigur tabata un weekend di tragedia.
E tabata un sla hopi duro pa e famia di fam S.J. cu a perde dos yiu muhe, riba un bierna santo. Pa e famia aki bierna santo a keda marca como un dia hopi doloroso pa nan pa hopi tempo.