BOGOTA, COLOMBIA:
Relaciona cu un investigacion haci pa husticia Colombiano, a bin sali na cla cu un total di 8 persona cu tabata interna na diferente Centronan di Rehabilitacion na Colombia a fayece pa motibo di maltratonan severo ricibi den e Centronan di Rehabilitacion. Aparentemente como 500 persona cu ta of tabata interna na diferente Centronan di Rehabilitacion na Colombia a bira victima di abusonan cometi pa esnan cu ta traha na e Centronan aki.
Basa ariba e investigacionnan haci, Ministerio Publico na Santander mesora a cuminsa tuma accionnan na 8 diferente fundacionnan priva di rehabilitacion, aki ta papia di fundacionnan caminda personanan cu problema di adicion tabata interna. Durante e investigacion a bin sali na cla cu esnan cu tabata of ta traha na e fundacionnan aki tabata maltrata e pashentnan aki, nan tabata abusa mentalmente, fisicamente y sexualmente di e pashentnan, es mas bou condicionnan inhumano y tur esaki a causa morto di por lo menos 8 persona. Segun Ministerio Publico tabata trata di mas o menos 500 persona cu a bira victima di e fundacionnan aki.
Durante e investigacion a wordo documenta cu esnan cu tabata interna tabata biba den condicion extremadamente malo, pa loke tabata cuminda y medicamento.
E accion aki a inicia despues cu a cuminsa ricibi varios keho y testimonio di pashentnan cu tabata victima di e Fundacionnan di Rehabilitacion, tambe autoridad a logra colecta varios pruebanan cu ta indica cu e Centronan aki tabata duna tratamento psikiatrico sin un control di un Profesional. E pashentnan tabata wordo droga, cu remedi (sedantenan) y asina tabata keda pa un periodo largo for di conocimento, durante e periodonan akinan nan tabata wordo viola pa motibo cu cu e pashent no tabata na su sano huicio. Tambe parti di e maltrato, pashentnan cu problemanan mental, na varios ocasion tabata wordo hiba na un supuesto camber di reflexion, den e camber aki nan tabata wordo tortura, baña cu awa frieu y mara.
Tambe varios denuncianan a wordo haci contra empleadonan cu tabata viola muchanan menor di edad. E muchanan aki tabata wordo constantemente droga cu sedantenan pa nan keda for di tino y esaki tabata haci mas facil pa e trahadonan por a viola nan sin cu nan victimanan por resisti.
Durante e investigacionnan haci a bin sali na cla cu algun di e personanana deteni pa autoridad, na varios ocasion tabata bisti (disfrasa) y haci manera nan ta autoridad y asina nan tabata menasa e pashentnan y intimidanan, pa evita cu e pashentnan por a haci denuncia contra e abusonan cometi pa e Centronan di Rehabilitacion.
E 21 detenidonan mester a presenta dilanti un Juez de control de garantias y nan cargonan ta homicidio, secuestro, violacion, maltrato y varios otro delitonan mas. E audiencianan di e control de garantia lo sigui mientras cu e caso mes ta sigui bou investigacion y e oficialnan ta sigui recolecta e pruebanan contundente pa asina e detenidonan aki por haya un castigo cu nan merece.
No ta conoci si lo sigui investiga mas di e centronan aki of por ta cu e ta algo masha normal di locual ta wordo yama pa otro maltrato y abuso, ta un modus operandi cu e centronan di rehabilitacion na Colombia ta implementa.
Na september ultimo Gobierno di Aruba a haye ta kibra un contract cu un Centro di Rehabilitacion na Colombia, despues di a wordo notifica pa DVG, cu lo a haya varios testimonio di pashentnan cu supuestamente lo tabata wordo maltrata y varios lo a keda trauma, despues di a regresa Aruba for di Colombia. E pashentnan aki ta bou tratamente y guia di profesionalnan na Aruba. Arubanative.com mes a wordo acerca na september pa un di e pashentnan y nos a entrevist’e, e la conta di su experiencia y tur loke e lo a mira cu ta pasando na e centronan di rehabilitacion na Colombia. Actualmente e personanan aki ta interna na Aruba mes na diferente centro. E caso aki ta bou investigacion y Hues lo mester dicta kiko realmente ta e berdad.
Potret: Ejercito Nacional y Cambio