ORANJESTAD – Departamento di Cultura Aruba ta invita comunidad di Aruba pa ban celebra Dia di Brazil. Diabierna: Parada cu Lanterna – Diasabra: Fiesta di Tambu – Diadomingo Feria di Cuminda y Parada Folklore Cultural. Despues di varios exitoso evento cultural cu a tuma luga e ultimo simannan, manera ‘Cantica di Caya’, ‘Show y Coronacion Reinanan Cultural 2024’, e fin di siman aki lo ta e culminacion pa celebra Dia di Brazil. Esaki lo ta e di 14 aña cu ta celebra Dia di Brazil, cu nos musica crioyo, nos cuminda local, nos trahenan tradicional y nos cultura Arubano den un dushi ambiente den cayanan di Brazil.
Departamento di Cultura ta invita henter Aruba pa ban celebra Dia di Brazil; Brasa Bo Cultura Aruba!
E programa pa e fin di siman aki ta lo siguiente:
Diabierna 30 di augustus: Parada cu Lanterna.
For di 6:30 p.m. nos cultura lo ser iliumina den e cayanan di Brazil. E ruta ta for di Centro di Bario Brazil pa Caya Bernadina Growell pasa Noord Cura Cabai pasa Rooi Koochi pasa Mabon y bek pa Centro di Bario Brazil. Un y tur ta ser invita pa bin admira y sostene e bunita parada di lanterna.
Diasabra 31 di augustus: Fiesta di Tambu.
Esaki lo tuma luga na Centro di Bario Brazil y lo inicia pa 8:00 p.m. Un invitacion pa comunidad pa no perde esaki, Tambu ta trece bida y alegria: Tambu tey pa keda!
Diadomingo 1 di augustus: Feria di Cuminda (mainta/merdia)
Riba Dia di Brazil, prome cu e Parada Folklore Cultural un invitacion na un y tur pa bin disfruta di nos cuminda local den dushi ambiente crioyo cuminsando pa 10:00 a.m. na Centro di Bario Brazil.
Diadomingo 1 di augustus: Parada Folklore Cultural 2024. (Atardi)
Pa culmina e fin di siman, un invitacion na henter comunidad tambe pa Brasa Bo Cultura! Participa y/o admira e celebracion di Dia di Brazil cu su Parada Folkore Cultural, un diadomingo pa celebra nos musica crioyo, nos trahe tradicional, nos cuminda local, nos cultura Arubano den dushi ambiente den e bario di Brazil. Esaki lo inicia pa 3 ‘or di atardi y e
e ruta ta Centro di Bario Brazil pa Caya Bernadina Growell pasa Noord Cura Cabai pasa Rooi Koochi pasa Mabon y bek pa Centro di Bario Brazil.
Departamento di Cultura ta gradici Fundacion Chico Harms cu ta na cabes di e gran celebracion aki, como tambe tur boluntario y instancia cu ta duna nan cooperacion y aporte pa haci e celebracion di Dia di Brazil uno exitoso.
Aruba, ban celebra, goza y engrandece nos cultura. Bin disfruta den bario di Brazil e fin di siman aki, cu nos pilar y reinanan cultural, agrupacionnan tipico, nos bailadornan y participantenan cu nan trahe folklore cultural.
Aruba Pabien, Brasa bo Cultura, Masha Pabien na e bario di Brazil.
