Presidente di Nicaragua, Daniel Ortega, a ofrece pa manda “combatientes sandinistas” pa apoya e ehercito di Venezuela den caso cu loke e la yama un “contrarevolucion armada” sosode, despues di e eleccionan di 28 di july den cua e autoridad electoral a proclama como vencedor presidente Nicolás Maduro, memey di señalnan di fraude di parti di e oposicion y cuestionamento di parti mayor di comunidad internacional.
Papiando na un cumbre virtual cu hefe di Estado de Alianza Bolivariana para los Pueblos De Nuestra América (ALBA), e mandatario a sostene cu “tin siguridad cu, si yega na e bataya, lo tin combatientenan Sandinista compañandonan.
Ortega a bisa cu un “bataya” na Venezuela “lo ta hopi mas grandi” cu esun cu a tuma luga na Nicaragua durante e Revolucion Sandinista, cu na 1979 a pone fin na e dictadura di Anastasio Somoza den e pais Centroamericano.
E PROBLEMA MES CU NICARAGUA AWENDIA
Nicaraguensenan ta sigui sufri represhon intensifica, e seramento di tur espacio democratico, y e exilio forsa di miles di journalista, miembronan di sociedad civil, defensornan humano, personanan religioso y tambe figuranan opositor.