Den e historia aki, un persona a perde su bida pa motibo di a bay reclama y a humilia un otro persona sin sa e conscuencianan cu esaki a trece cu ne pa su persona.
Tur cos a cuminsa riba un dia na cuminsamento di e luna di augustus di 1970, na San Nicolas y a caba fatalmente na San Nicolas. E personanan di e historia aki nos no conocenan y lo dunanan un nomber fictisio. E acusado/asesino nos lo yam’e Carlos y e victima nos lo yama Jacobo.
San Nicolas/Oranjestad: Riba un dia na cuminsamento di e luna di augustus na aña 1970, Carlos tabata den su auto y a mira un dama bunita canando den caya principal di San Nicolas, sin pensa dos biaha e la dicidi di tira un piropo y ofrece e dama bunita aki un lift. E dama cu no conoce Carlos bon a nenga e lift, pero aparentemente Carlos lo a keda persisti, mirando cu e tabata gusta e dama hoben aki, pero e dama no tabata tin interes den Carlos. Carlos tampoco no tabata sa bon ken e dama aki tabata ta, y ni ken tabata su pareha.
Reclama y humilia dilanti di un dama
Algun dia despues, Carlos tabata canando den Nassaustraat, ta basilando un otro mucha muhe y diripiente e la wordo acerca pa un homber, e homber aki tabata un taxista, cu nos lo yame Jacobo. Jacobo a para su auto y a bay direct riba Carlos y a cuminsa reclama Carlos dilanti di e mucha muher y dilanti tur otro hende cu tabata canando e momento ey eybanda. Jacobo a bis’se cu e no kier pa e sigui molestia e dama hoben na San Nicolas, pasobra e tin un relacion amoroso cu e dama aki y no kier pa e sigui insisti y persigui su mucha muher, pero e forma cu Jacobo a reclama Carlos, a pone Carlos sinti su mes hopi humilia y a dun’e hopi rabia pio cu Jacobo a reclame dilanti di un dama. Carlos den su rabia a conteste cu ” Oh, Mi no tabata sa cu e dama na San Nicolas ta pertenece na abo” y “e no tin bo nomber skirbi riba su lomba y by the way ami ta amigo di tur hende”.
Hopi hostina Carlos a cana bay y e taxista a subi su taxi y a sigui su caminda. Carlos a keda cu su rabia y a pensa con e lo bay baha su rabia. Pasobra e la sinti’e e atardi ey hopi ofendi, pero no por a haci nada.
Un wanta y un hinca fatal
Algun dia despues riba diadomingo 09 augustus, algo prome cu 7’or y mey di anochi, Carlos a bay dal bocht den San Nicolas, e tabata coriendo na altura di e hotel Las Delicias y segun Carlos, mes a declara e lo a scucha un auto pit’e y tambe lo a mira un homber ta zwaai cu su man haciendo un seña cu ne, pidiendo Carlos pa e bin cerca dje. Ora e la yega mas cerca e la mira cu tabata trata di e taxista Jacobo cu algun dia prome a humili’e den caya principal di Oranjestad. Carlos sin miedo y ainda hostina mesora a bay staciona su auto y a baha bay cerca dje, pensando cu awo ta mi chens pa pone na su luga.
Segun Carlos e taxista tambe lo a baha for di e taxi y asina nan a cuminsa discuti, insulto ta bay insulto ta bin, e problema lo a escala, cu na dado momento e taxista a dal Carlos un wanta basta bon den su cara, esaki a pone Carlos bira furioso y pio awo cu e la dal e un wanta dilanti di un dama, cu tabata sinta den auto di Jacobo.
Entrega su mes
Jacobo lo a bira pa bay subi den su auto y na e momento ey Carlos cu a perde strea di nort, a pasa man pa un cuchiu cu semper e ta cana cu ne y di patras e la bira claba e taxista un hinca den su garganta. Mesora e la realisa e error grandi di su bida cu e la caba di comete, sin pensa dos biaha, e la subi su auto y a core bay straight warda di polis, caminda e la entrega su mes.
Perdiendo hopi sanger y a fayece
Jacobo a keda gravemente herida y tabata perdiendo hopi sanger, mesora a core pidi ayudo pa den na Las Delicias, nan a yama pidi pa un ambulance cu urgencia. E tempo ey no tabata tin paramediconan abordo y no tabata tin cuenta di stabiliza prome cu transporta un victima pa hospital, e tempo ey ta di a pone e victima riba brancard y cu core cu velocidad halto pa yega mas lihe cu ta posibel hospital, pero lamentabelmente na caminda, Jacobo a fayece. Jacobo tabata tin 33 aña. Jacobo e tempo ey tabata un persona hopi conoci bou di taxistanan y tabata forma parti di e bestuur di Aruba Chauffeurs Unie (ACU), e tabata secretario di ACU-cooperation, cu poco prome cu e incidente lo a haci compra 3 tourbus.
Durante e asesinato den e taxi di Jacobo tabata tin un dama sinta y e abogado defensor tabata desea di a haya e dama aki como testigo den corte, mirando cu e situacion tabata basta complica y alabes tabata tin declaracionnan cu tabata contradici otro . Si di berdad Coco a pita y tambe con Carlos a tene e cuchiu, segun e abogado mirando e declaracionnan no tabata mustra di ta trata di un hinca intencional, pero e officier tabata contra y kier a djis sigui cu e caso.
Caso den corte
Dia 18 di september mester a cuminsa cu e caso den corte, pero e la wordo posponi pa asina por a laga traha raport Psykiatrico y raport di reclassering y pa e motibo aki a trata e caso te diabierna 11 December di 1970. E diabierna 11 di december 1970, Carlos a presenta den corte, e tabata acompaña pa su abogado di e tempo ey Mr. Wever.
Officier no ta full di acuerdo cu declaracion di acusado
Durante tratamento di e caso Oficier a cuminsa na bisa cu den e caso e prome acusacion contra Carlos ta homicidio y cu no tabata tin un motibo, segun oficier e ta haya cu e tabata un asesinato intencional. Tambe e ta haya cu e declaracion di Carlos referente e pitamento y e yamamento door di e victima e diadomingo fatal aki no ta corecto, for di e reconstrucion a keda demostra cu esaki no a sosode manera Carlos a declara anteriormente, mirando e posicion cu e auto tabata staciona y varios parti den su declaracion segun Officier no tabata cuadra. Officier ta haya cu Carlos ta un persona enfermo y cu ta frustra hopi lihe, esaki a keda demostra durante e prome y e di dos encuentro cu a termina fatal pa Jacobo. E prome biaha Carlos a bira mesora irita pa motibo cu e la wordo insulta den presencia di un dama y e di dos biaha pa motibo cu e la haya un wanta den presencia di un dama, esaki a pone perde cabes y a yega asina leu.
Diferente rapport traha
Segun e officier e la asesina e victima intencionalmente, e la sigui bisa cu e acusado/ Carlos a bira violento y a hinca su victima na un parti vital di su curpa. Asina officier a sigui y alabes a compara e caso aki cu algun otro caso similar cu hof a haya cu tabata intencional, segun Officier pa motibo cu e la hinca su victima cu tur su forsa di patras. Pa loke ta trata e grado di castigo, Officier a bay di acuerdo cu locual tabata para den e raport Psykiatrico den cual Carlos a wordo declara verminderd toerekenbaar. Segun Officier e tabata enfermo di orguyo ( reclasseringrapport). Tambe e tabata tin un lista largo di boet habri, e no tabata paganan. Officier a señala cu Carlos tabata un persona hopi agressivo esaki segun e raport di psykiatra. For di diferente raportnan a bin sali na cla cu Carlos lo tabata un bon hungado di comedia.
Pa loke ta e castigo cu e lo mester por a pidi pa e acusado tabata e maximo castigo di 15 aña. E motibo tabata cu e ta haya cu e acusado a actua inadecuado y no ta haya cu mester suavisa e circumstancianan presente. E acusado a usa e motibo pa defende su acto, usando cu ta e victima a provok’e durante e prome encuentro y alabes riba e dia di asesinato, e provocacion tabata cu e la yame cu un seña cu su man y tambe a dal’e un wanta y ambos biaha cu e la wordo humilia pa e victima tabata dilanti di un muher.
Hinca di trincion
E officier a sigui bisa cu e ta haya cu e prome provocacion a bin di Carlos mes, pa motibo cu e tabata molestia e mucha muhe y e mester por sa bon , cu esaki por tin riesgo y consecuencia cu ne. Riba e dia fatal, e victima a haci seña cu su man di ta yama e Carlos, segun officier no lo ta mas sigur cu Jacobo a wordo sorpresa pa Carlos? Tocante e victima, no a bisa mucho, djis cu e ta un persona conoci y cu ta un infracion den trafico so e tabata tin. Officier a haya cu e motibo cu Carlos a usa pa hustifica su acto no ta un motibo husto, mirando cu e circumstancia tabata den su desventaha, especialmente su declaracion referiendo con e asesinato a sosode. Segun officier, Carlos mester a acepta cu na momento cu e victima a bira lomba y a cana bay na su auto, cu e conflict a caba, pero Carlos na e momento ey, a bay su tras y a hinke di trincion . E ta haya cu e Carlos a actua manera un cobarde . Tambe cu e Carlos tabata tin un mal custumber di cana cu un cuchiu. Segun su strafkaart e la yega di haya su mes caba envolvi cu Husticia pa actonan di violencia. . E Conclusion di officier tabata cu e ta haya Doodslag sin motibo, e la hinca e homber di lomba, Officier na final a pidi 12 aña kitando e tempo cu e tabata den voorarrest caba.
Abogado Defensor, garganta ta un parti hopi delicado
E abogado Defensor Wever, a presenta e diferente raportnan cu excepcion di e raport di polis den cual den tres parti di raport ya nan a saca nan conclusion caba, cu e ta intencional y con e reconstrucion a bay ,e abogado no tabata di acuerdo cu ne.
E abogado a mustra riba e encuentro den Nassaustraat, caminda su cliente a wordo insulta door di e victima. Tambe durante e di dos encuentro caminda e victima mes a bira pa yama Carlos cu un seña di man, mirando cu e dama den e auto di e victima mester a mira e auto di Carlos pasa nan tras. De facto cu e Jacobo a sali for di su auto segun Mr. Wever tabata juist un señal cu e victima mes a yama e Carlos cu su man. Carlos a staciona su auto dilanti di e bar restaurant cu mas sigur e lo kier a bay paden. E posicion di Jacobo no tabata duideijk pa e abogado. Tambe e forma cu e la wordo hinca, segun e abogado, garganta ta un parti hopi delicado y cu un cuchiu ta drenta facilmente. E abogado a sigui bisa, cu jurisprudencia cu e officier a bin cu ne tabata djis cu e kier a trata na prueba cu Carlos a comete e asesinato intencionalmente, bisando cu ta un cuchiu grandi e la hink’e di lomba. Aki tabata trata di un cuchiu chikito y cu e la wordo hinca den garganta. Officier a pidi pa e acusado “Doodslag met opzet” pero e abogado defensor a pidi vrijspraak pa esaki, tambe referente e acusacion di “maltrato severo cu morto como consecuencia” e abogado a pidi pa tene cuenta cu e personalidad di e acusado y a pidi Clemencia.
na final a pidi 12 aña pero a haya 9 aña
Officier na su turno a bisa cu e victima tabata un homber grandi y e no por tabata para na momento cu e la wordo hinca pa motibo cu tabata imposibel pa e acusado por a yega na hink’e asina. Officier a pidi 12 aña di castigo di prison pa Carlos. Carlos na su turno a bisa hues cu e ta haya 12 aña mucho hopi y cu e la kere cu e lo a haya 6,7 of 8 aña maximo.
Hues a bis’e cu e lo pense y 24 di December lo dicta sentencia, Diabierna 18 di december 1970, hues a duna sentencia y a duna Carlos 9 aña di castigo di prison.