E historia aki, ta uno cortico pero hopi impactante, cu a sosode mas di 50 aña pasa den e barrio di Cura Cabai. Un barrio cu e tabata hopi trankil y a wordo sacudi pa e sucedido hopi tristo aki. Un candela cu a caba cu bida di un criatura di apenas 2 aña. Muy probablemente e candela a wordo cendi pa un su ruman cu e tempo ey tambe tabata mucha chikito inocente y sigur no tabata tin e conocimento di peliger di candela.
Den e historia aki nos lo uza nombernan ficticio; E mama nos lo yama Petra, e yiunan nos lo yama Linda y Buchito.
Riba un dialuna 04 december, un famia ta habri su dialuna mainta masha trankil y sin sa ki sorpresa amargo e dialuna mainta aki lo bay trece pa nan.
E prome dialuna di e ultimo luna di aña, manera ta custumber na Aruba poco poco ta cuminsa prepara cas pa e dianan di fiesta cu tabata den porta. E dia tabata mustra un dia masha normal manera custumber. E Mama a lanta trempan, e muchanan no a bay scol of ainda no tabata bayendo scol. Antes mayoria di mama no tabata bay traha pero tabata keda cas pa cuida su yiunan y esaki tambe muy probablemente lo tabata e caso di e famia aki.
E mainta aki Petra a lanta trempan, paso e tabata tin hopi trabou di cas pa haci y mester cushina tambe pa merdia. Trempan e la duna su yiunan nan desayuno, nan a baña, nan a bisti y tabata cla pa cuminsa nan dia, e dos muchanan chikito aki, e unico cos cu nan por haci ta bay hunga rond, pa nan mama por haci su trabounan di cas pendiente.
Mientras Petra a cuminsa ta haci cas limpi, su dos yiunan chikito a bay hunga pafo, den cura. Masha feliz nan tabata hunga core tras di otro pleita, cosnan di mucha. Den cura di e cas tabata tin un cuarto di palo, den e cuarto di palo tabata tin algun cos di hunga y e muchanan tabata gusta bay hunga eyden. E solo a cuminsa bira mas fuerte y den careda di 10’or ney e muchanan no kier a hunga mas den solo y a bay hunga den e cuarto di palo. Nan tabata hungando bon mucha asina y mama Petra tabata cabando di haci cas limpi pa asina cuminsa cushina. E la pone su paki swafel cla riba mesa pa bay cende e stoof, pa pone cuminda na candela. Net na e momento e yiu mas grandi a drenta paden y a mira e paki swafel riba mesa, lo a pasa man pa e caha di swafel y a bay hunga pafo cu ne.
Nan a bay cu e caha di swafel den e cuarto y keto keto nan a cuminsa test con ta cende e swafel, paso semper nan ta mira mama ta cende stoof, bela etc cu un penchi swafel, cu sigur no ta algo imposibel pa nan. Ate nan a logra cende un swafel, harimento, pero keto keto pa mama no haya sa, pa nan tabata manera un logro paso nan por cende swafel, asina a sigui cu e di dos, e di tres y den un di halamento di swafelnan aki, un penchi swafel na candela a slip cay for di nan man y a pega candela. Mesora nan a purba pag’e candela chikito, pero no a logra, hopi lihe e candela cuminsa bira mas y mas grandi. Hopi lihe e vlamnan a cuminsa podera di e cuarto di palo, Linda a logra sali na tempo for di e cuarto y a lubida riba su pober ruman chikito Buchito. Buchito tabata un criatura di apenas 2 aña, e pober a keda atrapa full patras den e cuarto patras di vlamnan grandi y den hopi huma.
For di leu por a mira e huma y haya e holo di candela, esaki tabata hopi fuerte. Mesora Linda a drenta paden y bou susto. Petra mesora a bira wak y a mira e cuarto completamente na candela y no tabata mira Buchito niun caminda. E pober muhe a spanta y a cuminsa grita desesperadamente, bisiñanan mesora a core bin pa mira con por nan yuda Petra combati e candela, otro bisiña a core yama brandweer y polis. Hopi lihe brandweer a yega y a logra paga e candela, pero lamentabelmente ora a paga e candela, e bomberonan a bin topa cu e curpa chikito di Buchito ya sin bida, e tabata memey di e restonan di cosnan cu a kima den e cuarto, e pober criatura a fayece kima. E tragedia aki a laga un tristeza enorme atras pa famia y bisiñanan di Noord Cura Cabai pa hopi tempo.
Antes ta hopi candela a wordo cendi door di muchanan cu tabata hunga cu paki swafel, e hungamento cu swafel den e caso aki a laga un historia tristo y hopi doloroso pa e famia.
Un hende grandi a contanos di e sucedido y a bisa cu pa e motibonan aki, e nunca tabata laga muchanan hunga for di su bista, pasobra maldad por drenta te hasta den cabes di criaturanan chikito. Nunca pone paki swafel na alcanse di muchanan chikito, paso e ta algo cu ta “yama” muchanan chikito pa bay hunga cu ne y ora e penchi swafel ta na candela nan por spanta y cende candela. Otro conseho cu e grandi a duna ta ora cu muchanan ta hunga keto, semper bay tira bista paso ta algo di mala mucha nan por ta haciendo, miho nan ta pleita, papia y hari paso mayoria di biaha e ora ey no tin nada particular.
Esaki tabata un otro sucedido hopi tristo cu a bay den historia di nos isla Aruba, un criatura a perde su bida y esey sigur tabata un pagina scur den e historia di e sucedidonan di 1967 na Aruba, especialmente pa e famia y e habitantenan di Noord Cura Cabai. Tin mas caso den Historia di Aruba, unda un criatura ta fayece door di candela.