E biaha aki nos historia lo ta dedica na un drama/tragedia, cu un famia den menos cu 4 dia a pasa aden. Y e ora 7’or a hunga e rol den e historia aki.
Tur cos a cuminsa riba un dialuna 20 di April, e fecha aki a habri caminda pa algun sucedido cu a impacta un famia na Aruba. Alabes durante algun dia e famia aki a experiencia yen di actividadnan paranormal y a biba situacion nan, cu nos awendia ta yama bijgeloof, pero cu nos bieunan tabata kere fielmente den nan.
Nos lo duna e protagonistanan di e historia aki nombernan ficticio
Riba e dialuna aki un tata, welo, omo, un meneer grandi di edad nos lo yame Pedro, Pedro a fayece, riba e dialuna aki, den careda di 7’or di anochi. E famia sin sa cu e ora 7’or lo marca historia pa nan. E nieto nos lo yame Rudy, e nieto tabata biba na Corsou. Rudy tabata casa y cu su casa nan tabata tin un baby mucha muhe di 10 luna. Manera cu Rudy a ricibi e tristo noticia cu su welo a fayece, e la dicidi di bin Aruba pa entiero.
E entiero di Pedro a tuma lugar diaranson 22 di April, for di oranan di mainta algun miembro di famia a bay busca e defunto na e cas Funeral Zepp Wever cu tabata situa den Zandstraat. Manera antes tabata e custumber, entiero ta para na Cas. Den careda di 10’or di mainta e morto a yega cas caba. Na cas a habri e caha y asina henter dia famia, amigonan, conocirnan y bisiñanan tabata por a pasa mustra nan ultimo respet y despedi di e defunto.
Tur cos tabata mustra normal, un entiero manera nos na Aruba tabata custuma cu ne antes. Pero durante e entiero cosnan straño a cuminsa pasa. Un di nan cu a hala atencion di varios miembro di famia tabata cu e nieto Rudy cu a bin di Corsou tabata demasiado contento y tabata haci hopi wega cu esnan cu a bin entiero. Otro cos, segun e famia ora su señora a yame for di Corsou ni mata e kier a papia cu su casa. Señalnan straño of djis coincidencia?
E man di e defunto unda nan a pone e infuus p’e, a cuminsa sangra, sanger tabata keda core. Pa evita cu e sanger keda core, nan a busca un tape y a tapa esaki. Na momento cu a bay tape e man, nan a ripara cu su man tabata molie molie. Un bieu cu tabata na e entiero mesora a bisa hopi preocupa: “ hmm pronto e lo hiba un mas.” Un otro señal of djis bijgeloof?
Den oranan di merdia, algun famia di Corsou cu a bin pa entiero a dicidi di bay na e cas di un yiu di Pedro, pa asina bay come algo, e cas tabata keda net otro banda di caminda. E muhenan a drenta den cushina pa asina saca cuminda, mientras nan tabata papia y tabata haci joke cu otro, nan a start un harimento, pero di golpi tur a keda keto y tur sorprendi ora un a bisa otro cu si ba scucha? Den e sala di e cas tabata tin un hende muhe mas cu tambe tabata hariendo masha duro mes. Nan a bay den e sala pa asina ta sigur cu no tabata tin mas hende den e cas, pero den e sala no tabata tin hende. Bijgeloof of paranormal?
Despues cu nan a sirbi cuminda y a come, nan a bay bek na e cas unda e entiero a para. E ora pa bay despedi di e defunto tabata acercando y Rudy tabata haci yen cos cu normalmente un homber grandi no ta haci durante un entiero. Por ehempel e la cuminsa core den e sabana dilanti di e cas. Un familiar a cansa y a bise “ Porfabor laga e defunto bay descansa na paz.” y pa e comporte.
E momento pa despedi y cera caha a yega, e famia a despedi di nan tata, welo, ruman etc. y a cera e caha, y nan tabata cla pa cuminsa saca e caha for di cas pa hink’e den e Cherche. Diripente un taxi a yega para dilanti di e cas, for di e taxi a baha e casa di Rudy cu su baby di 10 luna den brasa. Nan a pidi si e por mira e bieu sikiera pa ultimo biaha ainda, pa e tambe por despedi di Pedro. Maske cu ya a cera e caha caba, a haci un excepcion y a habri e caha bek pa e dama por a despedi di e difunto.
Despues a cera e caha bek y a hink’e den e Cherche. Esaki sigur no ta algo cu ta sa pasa normalmente, aki tambe por tabata tin algo di bijgeloof su tras?
Na momento cu e stoet ta cla pa sali for di e cas pa bay misa, e auto di morto no kier a start, despues di algun inteno toch a logra start e, pero mester a core poco poco pa por a yega misa. Den Misa Rudy tabata hopi inquieto, e tabata cana manera loco, e no por a sinta keto den un banki. Tambe segun famia e tabata keda pleita cu su casa. Tur hende na entiero a nota cu Rudy tabata actuando masha nervioso y stranjoa, pero no tabata compronde kiko tabata pasando cu ne. Den Santana despues cu a cera e graf, Rudy a pinta riba e graf y a bisa dilanti esnan para na e graf cu “aki mi tambe lo bay.”
Despues cu nan a caba na santana y tur a regresa cas, esunnan cu mester a bay bek Corsou a cuminsa prepara pa bay bek, pero nan a dicidi cu nan ta bay come prome cu nan bay airport. Rudy cu tambe tabata biba na Corsou tabata manera ansha y no kier bay a come prome cu bay airport. E la dicidi cu e ta bay airport pa check in prome y despues lo a bin bek pa come. Hunto cu su casa, e la subi auto, un stationwagen di marca Toyota y a sali bay direccion di Airport, nan baby a keda cerca su famia na cas ta warda.
Den careda di 7’or Rudy cu su senora yegando airport ta haya nan mes envolvi den un accidente hopi serio. Esaki a sosode dilanti airport, na momento cu nan a bay lora pa drenta e tereno di airport. E motibo di e accidente tabata cu Rudy, kende no tabata mucho conoci cu e caminda, no a duna preferencia na un otro auto y a bay dal frontal contra esaki, e auto tabata un auto Mericano grandi. E impacto tabata hopi fuerte unda cu Rudy a wordo saca for di e auto y a bay cay banda di e auto y a keda seriamente herida.
E casa di Rudy tambe a resulta gravemente herida y a keda pega den e auto, materialwagen di brandweer mester a bin corta e auto pa asina libera e señora for di e auto. Rudy y su casa den un situacion sumamente critico a wordo transporta cu hopi urgencia pa hospital.
E tempo ey no tabata tin cellular y den e area di Santa Cruz pariba, masha poco cas tabata tin e luho di tin un telefon di cas. E famia preparando pa bay Corsou tabata wardando riba Rudy cu su casa, nan a wordo sorprendi pa un bisiña cu tabata e unico eybanda cu tabata tin telefon. E bisiña a core bin trece e noticia tristo pa nan. E la bin bisa nan cu e la caba di haya un yamada cu a caba di sosode un accidente hopi serio dilanti airport y cu Rudy y su señora ta esnan envolvi. Tambe cu Rudy na yegada na Hospital a fayece y su señora ta interna pero su situacion ta hopi critico.
E famia completo a bay den un shock, casi tur a core bay hospital, mientras algun a keda cas, pero nan tabata tin miedo di keda na e cas di Pedro, tur a bay drumi na e cas dilanti di e Pedro su cas. E baby di Rudy tambe a bay cu nan.
Enberdad na momento cu e famia a yega hospital nan a wordo informa cu despues cu ambulance a trece nan hospital, un rato despues den careda di 7’or y 20 Rudy a fayece , su senjora a keda interna den cuido intensive, su situacion tabata hopi critico.
E famia hopi tristo a bolbe bek cas, den un camber e muhenan y e baby a bay drumi. E hombernan a bay drumi den un otro camber. Den careda di 4’or di marduga e hombernan a wordo lanta for di sonjo nan tabata scucha con e cachonan tabata blaf y tabata yora masha mahos mes.
Mainta a habri y hopi trempan e doñonan di cas a lanta y a bay sinta pafo, na e cas tabata reina un ambiente hopi tristo, e señora di e cas a conta cu den careda di 4’or di marduga e la scucha un stem cu tabata bin for di e mondi patras di e cas y tabata grita ; “ Unda mi yiu a keda” e stem tabata grita y tabata yora bay te bou di e garashi di e cas, caminda e señora a scucha yoramento tambe. E otro muhenan no a scucha nada ni e blafmento y ni e yoramento di e cachonan.
Tambe un di e hombernan cu a bin di Corsou a conta cu un rato despues cu Rudy a muri e tabata canando riba caminda eybanda y a scucha un stem parecido na esun di Rudy, e stem a bis’e “duna mi un shot”. E mesun homber aki durante e entiero di Pedro tabata tin un botter di Coecoei y tabata parti shot.
Tur hende tabata sinta pafo na e cas y nan tabata [papia di kiko tur nan a scucha of sinti di anochi pa mainta. Di panort e bisiña a bin na careda atrobe y un biaha mas a bin trece un noticia, e bisiña a bisa nan cu e la caba di haya un yamada di hospital bisando cu e casa di Rudy tampoco a make it y lamentabelmente e la caba di fayece na hospital y cu esaki a sosode rond di 7’or di mainta, mas o menos 12 ora despues cu Rudy a fayece. E pareha a laga un criatura di 10 luna atras.
Famianan di e senjora, mesora a cuminsa haci e tramitenan pa hiba e curpa di nan ser keri pa Corsou pa asina der’e na su isla natal. Mientras e famia di Rudy a cuminsa prepara pa e entiero na Aruba. Tur hende a bay na e cas di e mama di Rudy.
Na momento cu nan tabata buscando un panja adecuado pa der’e aden, nan a bin topa cu e bachi cu e la bay entiero di su welo cu ne y pa nan sorpresa nan a bin topa cu e rouwband ainda hinca den su bachi. Dus e no a tire den e graf ora a dera su welo. Bijgeloof? Na Aruba e bieunan tin e creyencia cu esaki ta hopi mala suerte ora no tira e rouwband den graf y pio bay cas bek cu ne. E bieunan ta bisa cu ta masha malo mes. Nan lo sa kiko nan lo kemen cu e bijgeloof aki.
Al fin famia a dicidi pa Rudy wordo dera den su trahe di mariachi, e tabata toca guitara den un grupo di mariachi. Esaki tambe tin un otro bijgeloof di antes su tras, manera e bieunan ta bisa cu no dera hende den uniform, paso e ta caba cu e compania of banda etc. Bijgeloof of casualidad, pero enberdad algun luna despues e grupo di mariachi aki a kibra tambe.
Pa basta tempo miembronan di famia di Rudy y su casa tabata keda scucha constantemente “ unda e ta” nan no sa si ta e alma di e defuntonan tabata puntra pa e baby of ta puntra pa otro.
Asina hopi bijgeloof, creyencia lo tin su motibo, hopi biaha nos ta skeptico y no ta kere, no ta worry of ta ignora e señalnan aki, pero pa e famia aki si bijgeloof a bira realidad.
E ora 7’or tabata e ora crucial pa e famia aki, e la hiba 3 miembro di famia.
Aki ta unda e accidente fatal a tuma lugar 43 aña pasa
Fuente: Informacion ricibi di famia & Amigoe di Curacao