Ariba diabierna 28 di juni ultimo, de un sala completamente yen, 131 conhuntamente cu Pan American Development Foundation a estrena e short movie ‘My Story’.
Desde luna di maart e aña aki 131 a start cu implementacion di e proyecto ‘My Story’. ‘My Story’ ta un proyecto cu ta stimula empatia entre hobenan local y migrante, y asina aki trata di disminui discriminacion y xenofobia. Danki na fondo propociona door di e Bureau of Population, Refugees, and Migration (BPRM), 131 cohuntamente cu Pan American Development Foundation por a cuminsa cu implementacion di ‘My Story’ den 2024.
Na ‘My Story’ a participa 8 hoben local y 8 hoben migrante. E grupo di hobenan migrante ta consisti di hobenan naci na Colombia, Haiti y Venezuela. ‘My Story’ a consisti di 6 sesion den cual e hobenan a siña tocante Derecho di Mucha, Igualdad, creacion di arte y actuacion, a crea un pintura y a crea y actua den un ‘short movie’.
Durante sesion number 2 e hobenan a bishita e hogar di otro. Durante e bishita aki e hobenan a siña conoce otro y otro su famia. Tambe nan a intercambia di informacion tocante cada un su cultura. E bishitanan aki a crea un amistad bao di e hobenan pa cu otro. Nan experiencia durante e bishitanan ta e inspiracion pa cu e ‘short movie’. E ‘short movie’ a wordo scirbi y actua pa e hobenan mes. Den e ‘short movie’ ‘My Story’ e hobenan ta ilustra con nan ta desea pa nan hogar ta, y simultaneamente con nan ta desea pa e hogar Aruba ta.
Durante e estreno di e short movie a hiba palabra e director di 131, e ‘program manager’ di Pan American Development Foundation Aruba & Curacao y prome minister di Aruba. E estreno a tuma lugar den e IMAX Auditorium na The Movies @ Gloria.
Despues di e estreno di e ‘short movie’ a tuma lugar un exposicion di e pinturanan cu cada un di e hobenan a crea. Cada pintura ta e storia individual di cada hoben. E publico presente a acudi na e exposicion cu a tuma lugar ariba e pasillonan na The Movies @ Gloria.
Durante e exposicion e hobenan a duna e publico presente informacion tocante nan creacion, y pa medio di un ‘QR-Code’ añadi na e pintura, e publico por a ricibi e ilustracion cu su siginficacion.
Pa mas informacion tocante ‘My Story’ por tuma contacto cu 131 via nos website: 131.aw, facebook: https://www.facebook.com/aruba.131/, email: [email protected] of telefon 5886138/ 5884011.
