Home » Aruba Airport Authority N.V. a celebra “Pride Month” cu diferente actividad

Aruba Airport Authority N.V. a celebra “Pride Month” cu diferente actividad

Fomentando un cultura di diversidad y inclusion

by Admin
0 comment 99 views

 

 

 

ORANJESTAD- Pa celebra Pride Month/ Luna di Orguyo, durante henter luna di juni Aruba Airport Authority N.V. a organisa un serie di actividad p’asina honra y apoya e comunidad LGBTQI+. E actividadnan aki ta refleha e compromiso cu AAA tin cu diversidad, inclusion y celebrando tur individuo, independientemente di nan identidad. 

 

Durante luna di juni, AAA a actualisa tur su profile pictures riba rednan social cu colornan cu ta representa e comunidad LGBTQI+ y a dedica diferente publicacion na e celebracion aki cu e meta pa crea concientisacion y alabes demostra sosten na Pride Month. Ademas, pa prome bes, AAA a hisa bandera di “pride”, celebrando amor, diversidad y inclusion.  

 

Den un muestra colorido di compromiso, a cambia e luznan den e sala di yegada pa colornan di regenboog, y e luznan di e toren tambe a refleha e colornan di regenboog, di e manera aki a crea un ambiente amabel y di sosten pa tur e pasaheronan como tambe pa e personal di aeropuerto.  

 

Pa termina e celebracionnan cu a tuma luga pa luna di juni, AAA a organisa un evento special caminda a invita personal di AAA y e miembronan di e comunidad di Aeropuerto di Aruba pa demostra nan sosten, saca potret, relaha cu e ritmo di un DJ y disfruta di diferente treat dushi. E evento aki ta fungi como un demostracion di e sosten continuo cu AAA tin pa e comunidad LGBTQI+ y su dedicacion pa fomenta un cultura di diversidad y inclusion.  

 

“E actividadnan aki ta simbolisa e compromiso di AAA cu diversidad, inclusion y e sosten na e comunidad LGBTQI+ durante Pride Month”, tabata palabra di Barbara Brown, Chief Revenue Development & Communications Officer na AAA. “Nos ta orguyoso di por celebra Pride Month y demostra nos dedicacion pa crea un aeropuerto inclusivo pa un y tur. E esfuersonan aki ta cana man den man cu e Sustainable Development Goals di Nacionnan Uni, specificamente SDG 5: Igualdad di genero y SDG 10: Reduccion di desigualdad”, asina Barbara Brown a termina bisando. 

 

Tocante AUA Airport

AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 78% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba. 

Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio