Home » A.T.A. a celebra aniversario di seis empleado durante evento di ‘You Anniversary’ na Norte America

A.T.A. a celebra aniversario di seis empleado durante evento di ‘You Anniversary’ na Norte America

‘A honra aniversario di 5, 10, 20, y hasta 25 aña den servicio di A.T.A.’

by Admin
0 comment 80 views

 

 

 

Durante di un anochi di celebracion, Aruba Tourism Authority (A.T.A.) orguyosamente a reconoce e dedicacion y logro di su empleadonan durante evento di You Anniversary na Norte America. Un evento cu ta wordo organisa cada dos aña pa asina reconoce e contribucion valioso di empleadonan cu tin 5, 10, 20, y hasta 25 aña den organisacion. Pa e ocasion aki a bishita e oficina di A.T.A. na Merca, a organisa un sesion den ekipo y un anochi ‘You Anniversary’ especial. Esaki banda di reunionnan unda ta trata e plan y strategia pa e aña actual y venidero y evalua hopi aspecto importante pa cu nos turismo. 

Den nan discurso, Ronella Croes CEO di A.T.A. y Sjeidy Dijkhoff-Feliciano Area Director di Norte America a expresa gratitud na e seis miembro di ekipo pa nan sosten y compromiso continuo durante hopi aña. Riba e anochi special aki, cu a conta cu presencia tambe di Sanju Luidens-Daryanani CMO di A.T.A., Shadey Figaroa HR Manager y Raul Piar ehecutivo di HR, a reconoce Natasha Lee Soy – Sales Manager New York (5 aña), Ayerim Maduro Lacle – Marketing Manager Norte America (10 aña), Cherrylusha Bidgood Flanegin (10 aña), Dalila Santiago – Management Assistant Norte America (20 aña), Kim Riddle – Business Development Manager region di Estados Unidos (25 aña), y Marie Iervolino – Management Assistant di A.T.A. Norte America (25 aña). Tur por ta orguyoso di logronan significante den nan carera, y tur a percura pa representacion excepcional di pais Aruba y pa proyectonan exitoso. A.T.A. ta orguyoso di cada un! 

 

“E celebracion aki no solamente ta marca e aña di servicio y lealtad, pero alabes ta reconoce e resiliencia, merito mereci, y logro di cada un di e individuonan aki na nos organisacion di A.T.A. cu ta keda evoluciona segun tendencia internacional y na nos mesun pais”. tabata palabra di Ronella Croes CEO di A.T.A. 

 

E evento a sirbi pa para keto na e impacto significante y na e esfuersonan di A.T.A. pa cu e bienestar di e comunidad Rubiano. Alabes, a reconoce y celebra e trabou excelente di e mercado di Norte America, subrayando e popularidad continuo di Aruba como un destinacion lider den e region. A.T.A. ta enfatisa cu e exito aki ta e resultado directo di e trabou duru y dedicacion cu e ekipo ta provee. A subraya e importancia den ofrece experiencianan inolvidabel na e bishitante, y pa crea y mantene un impresion duradero conocí como e sentimento cu Aruba ta laga atrás den cada bishitante, esta ‘The Aruba Effect’.

 

Cu sosten y colaboracion di cada empleado, y cu mira pa futuro, A.T.A. ta continua na evoluciona como organisacion pa por sigura un industria di turismo exitoso y di calidad den balansa cu e comunidad di Aruba y su bienestar, proteccion di nos naturalesa y medio ambiente y alabes stimulando y salvaguardiando un experiencia vacacional cu ta satisface e bishitante. 

 

Aruba Tourism Authority (A.T.A) un biaha mas ta extende palabra di felicitacion y gratitud na e seis empleadonan aki cu merecidamente a wordo reconoci pa nan tremendo logro y trabou. Pa medio di e celebracion di “You Anniversary” aki, a celebra y honra un total di 95 aña combina di trabou duro pa Aruba! Pabien!

 

Tocante Aruba Tourism Authority (A.T.A.)

Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio