Oranjestad – Aruba
Diasabra mainta Wardacosta a detecta un boto sospechoso riba lama yegando costanan di Aruba. Mesora a manda patrulla di Wardacosta pa bai detene e boto cu tawata nabegando rumbo pa Eagle Beach.
Na momento cu boto y e cuater personanan a yega costa y tuma nota di autoridad, nan tur a purba huy. E agentenan di Wardacosta a logra detene dos di e personanan, mientras otro dos a logra huy.
Wardacosta a lanta su helikopter tambe pa patrulla e area for di laira. Durante control na bordo di e boto e agentenan di Wardacosta a haya diferente pakete cu droga y 3 arma. E dos hombernan cu a ser detene di nacionalidad Colombiano y Venezolano huntu cu mas di 700 kilo di droga a wordo entrega na Cuerpo Policial Aruba y ta pendiente pa mas investigacion.