Home » MINISTER ENDY CROES TA FELICITA TUR SCOL CU A PARTICIPA DEN E EXITOSO COMPETENCIA DI BAILE DI WEGANAN ESCOLAR 2024

MINISTER ENDY CROES TA FELICITA TUR SCOL CU A PARTICIPA DEN E EXITOSO COMPETENCIA DI BAILE DI WEGANAN ESCOLAR 2024

by Admin
0 comment 56 views

Un total di 8 scol a participa den e gran evento di baile cultural, moderno y deportivo.
ORANJESTAD: Diabierna, 7 di juni, e gran evento di baile di Weganan Escolar 2024 a tuma luga den Aruba Entertainment Center. Presente den e ocasion aki tabata Minister di Enseñansa y Deporte Endy Croes hunto cu su kerida esposa Dilailah Croes – Odor, Prome Minister Evelyn Wever-Croes, Minister di Finansas y Cultura Xiomara Maduro, Minister di Husticia y Asuntonan Social Rocco Tjon, cabesante, docente y demas invitadonan special. Un ambiente total tabata reina den Aruba Entertainment Center. Cada scol a bin cu un gran fanaticada.
Un total di ocho (8) scol preparatorio, special, basico y secundario a participa den seis (6) diferente categoria durante e gran competencia di baile escolar. E aña aki a introduci un categoria nobo, unda e maestronan tambe a participa den e concurso di baile. E alumno- y maestronan di scol preparatorio, special, basico y secundario a demostra nan talento y creatividad durante e evento di baile cultural, moderno y deportivo.
E grupo di baile NTG dancers bou guia di Marisol Peña a duna un tremendo presentacion di baile, sigui pa un show di baile di Dazzling Dancers bou di guia di Jeanique de Palm. Ademas di esaki, a rindi homenahe na Sr. John Freddy Montoya. Sr. Montoya a ricibi un bunita presentacion dedica na su honor durante e anochi aki. Baile ta un forma emocionante y social di keda activo. Haciendo competencianan sano asina pa nos mucha- y hobennan, ta contribui pa mantene nan den bon caminda.
Na final di anochi a saca ganado di diferente categoria, esta Categoria di Scol Preparatorio: Imelda Kleuterschool, Categoria Scol Special: Scol Paso pa Futuro, Categoria Scol Basico 1, 2 y 3: Mon Plaisir Basisschool, Categoria Scol Basico 4, 5 y 6: Prinses Amalia Basischool, Categoria Scol Secundario: Mon Plaisir College Havo Vwo y Categoria Maestro: Mon Plaisir Basisschool. E anochi a culmina cu un gran sopresa di e famoso cantante Jeon cu a deleita tur presente cu su cancion.
E mandatario di Enseñansa y Deporte ta gradici IBiSA, Sra. Marisol Peña y Comision di Competencia di Baile di WE 2024, Ministerio di Enseñansa y Deporte, Maestronan di Ceremonia Sandra Croes y Tarrick Ras y tur cu a traha duro pa realisa e gran evento escolar aki. Alabes, ta gradici Gabinete Wever-Croes II, Fundacion Lotto pa Deporte, Stichting Sportsubsidie Aruba (SSA), Utilities, SETAR NV, Aruba Airport Authority NV (AAA), Aruba Investment Bank (AIB), Departamento di Cultura Aruba (DCA) cu a contribui pa haci e competencia di baile di Weganan Escolar 2024 posibel. E mandatario di Enseñansa y Deporte ta aplaudi tur scol, cabesante, docente y mayor cu a duna tur di nan parti pa realisa e proyecto bunita aki. Finalmente, ta felicita tur participante y e ganadonan di e exitoso Competencia di Baile di Weganan Escolar 2024.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio