ORANJESTAD – Departamento di Integracion y Maneho di Stranhero, DIMAS, ta anuncia un cambio significante pa mehora e contacto entre comunidad y DIMAS door di integra e servicio di WhatsApp den nan website.
Despues di algun tempo di trabao intensivo y planificacion, awe DIMAS tin e placer di informa cu entrante 10 di juni 2024, tur persona cu ta busca informacion di nan permiso, of tin cualkier pregunta general relaciona cu e proceso di aplica pa permiso, documentonan necesario pa cierto permiso etc, por tuma contacto cu DIMAS a traves di WhatsApp riba www.dimasaruba.aw
E contacto via WhatsApp lo simplifica y facilita e contacto entre comunidad y DIMAS. Cada mensahe via Whatsapp ta atendi directamente pa e ekipo di Front Office di DIMAS, cu a ricibi training riguroso pa facilita henter e proceso di comunicacion aki.
Mirando e avance acelera den tecnologia y comunicacion, DIMAS a haya prudente pa “catch up” y cumpli cu e metodo di comunicacion mas uza na Aruba y den region. E integracion di WhatsApp awo ta conecta e cliente y DIMAS di forma eficiente y conviniente, y ta provee e cliente tur informacion cu e tin mester di forma rapido y directo.
Pa tuma contacto cu DIMAS via WhatsApp, subi www.dimasaruba.aw. Riba e pagina principal ta haya e simbolo di WhatsApp, klik riba esaki y bo ta conecta cu e personal di DIMAS, durante orario di trabao entre 7:30 am y 4:30 pm.
E iniciativa aki ta refleha e compromiso di DIMAS pa uza avancenan tecnologico pa sirbi e comunidad di manera mas efectivo y eficiente.