Un consul ta un funcionario halto y reconoci pa e tratado di Vienna
ORANJESTAD – Cuerpo Consular di Aruba a reuni cu Prome Minister Evelyn Wever-Croes diaranson 5 di juni pa elabora riba varios tema di importancia. Presente tambe den e reunion tawata señora Jocelyne Croes, Directeur DBB. Cuerpo Consular di Aruba ta representa tur Consul Profesional y Consul Honorario cu ta estableci na Aruba. Esaki ta cay bou e cartera di Relacionnan Exterior cu ta resorta bou e ministerio di Prome Minister di Aruba.
Pa varios aña caba Aruba ta conta cu ciudadanonan di otro pais cu a bin establece na e isla y asina yuda cu e desaroyo economico di e pais. Recientemente Minister di Labor, Integracion y Energia señor Glenbert Croes a yega na un acuerdo cu e Cuerpo Consular, e asina yama Protocol di Cooperacion cu lo ta un solucion eficiente pa locual ta trata e otorgamento di permiso. A traves di cada Consulado, esaki lo brinda un plataforma di apoyo sincero, y guia honesto na tur esnan cu kier bin haci un bida na Aruba. Lo duna asistencia na esnan cu kier regularisa nan instancia na Aruba, esnan cu kier pidi un extension di nan permiso of saca nan permiso. E protocol aki lo sigura cu e proceso lo sosode via un canal legitimo, cu asistencia di DPL of Dimas door di e propio consuladonan.
A bin cu e acuerdo aki pa motibo cu tin situacionnan andando unda e asina yama tramitadornan di permiso, cu ta personanan cu ta tuma e encargo pa tramita e permiso di trabou di e aplicante, no ta cumpli. Tin casonan unda e tramitador ta cobra un suma exhuberante na e aplicante sin cumpli cu e trabou y tampoco ta debolbe e placa na e persona. Gobierno di Aruba ta condena echonan asina y no lo permiti abusonan asina sigui sosode.
Prome Minister a indica cu un consul ta un funcionario halto y reconoci pa e tratado di Vienna cu ta reconoce e privilegionan, derechonan y autoridad di un consul. Na Aruba e consulnan ta gosa di tur e privilegionan aki y ta eherce nan trabou libremente representando e ciudadanonan di nan pais.
“Recientemente un delegacion di Relacionnan Exterior di Hulanda a reuni cu e Cuerpo Consular di Aruba y esaki a trece un optimismo grandi entre nan ya cu nan por a mira cu nan posicion ta wordo reconoci, respeta y aprecia na Aruba. Mi lo sigui tin reunionnan cada tres luna cu e consulnan y asina trata tur tema cu ta di nan preocupacion y di e ciudadanonan di e pais cu nan ta representa”, Prome Minister a indica.