Diasabra anochi despues di un ausencia di 6 aña a tuma lugar un otro edicion di Flip Flop Festival presenta pa cerbes Chill y Elite Empire Entertainment. For di trempan miles di persona a presenta na Harbor Arena pa asina disfruta di un festival cu diferente presentacion musical, tanto local como internacional. Nos mester menciona cu for di exterior tambe tabata tin bishitantenan cu a sea biaha specialmente pa e evento aki of cu tabata na Aruba caba.
Despues cu a bira conoci cu mester a muda e evento for di Bushiri Beach pa Harbor Arena , e ekipo di Elite Productions hunto cu tur partner logistico a traha ‘around the clock’ pa por a prepara e localidad. E esfuersonan combina aki a logra pa e publico por a haya un Harbor Arena completamente cla pa por biba e experiencia di Flip Flop Festival. For di e mega escenario, te na e tent di Caribang Djs, te na e food court, te na e diferente barnan, e publico a haya su balor pa su carchi di entrada.
Musicalmente cada fanatico sea di un genero of banda/dj specifico a sa di por gosa durante henter anochi. Si papia cu varios persona cu a atende, por resumi cu e presentacionan di e banda KES The Band a resalta. KES a subi e escenario cu un energia manera e so tin y a canta tur su exitonan di pasado pero tambe algun cancion nobo cu e publico tambe a disfruta. Naturalmente otronan manera Mical Teja y Angel Dior cu ta pa prome biaha riba nos isla tambe a sa di deleita e publico na un forma satisfactorio. Alex Sensation hunto cu Brazil 21 tambe a pone e publico den e amboente.Nos bandanan local naturalmente no a defrauda e publico. Un pabien grandi na e.o Tsunami, Mysitcal Connection y Ziggi Recado & The Nayamari cu a presenta un espectaculo pa cada fanatico.
Durante di Flip Flop Festival e arte di D.J tambe ta hopi importante y pa cu esaki nos djnan local y internacional a sa di pone e publico baila for di 5 or di atardi te oranan laat di mainta. E aña aki a introduci un tent apart unda cu e musica no tabata e mesun cu e escenario principal. Aki e organisacion di Hulanda, Caribang a sa di combina diferente dj local y internacional. E area aki a resulta hopi positivo mirando cu henter anochi tabata tin hende bailando. Maestronan di ceremonia Tarrick Ras, Big Reckless, MC Samil, y Mark Benson tambe a sa di anima e multitud, manteniendo e energia halto.
Cerbes Chill como partner principal hunto cu su otro marcanan manera Sprite y Bacardi tambe tabata bon visibel durante e festival cu entre otro ‘Happy Hours’, ‘Mojito Bar by Bacardi’ y tambe un ‘360 Photo Booth’ by Sprite.
Di parti di Elite Empire Entertainment y Chill Beer nan kier gradici cada un di e miles di persona cu a atende e festival. Tambe un gradicimento grandi pa tur autoridad di Aruba y personanan cu a traha pa por a haci e festival un realidad. Keda pendiente pa Flip Flop Festival 2025!
Flip Flop Festival ta un presentacion di Chill Beer, CMB, Setar NV, Coca-Cola, Bacardi, Kini Kini Transfers & Tours, Embassy Suites, Renaissance Wind Creek Aruba Resort, Ecotech, ATCO, Elite Empire, Rayo, Elite Productions, y XFM 102.7.