Siman pasa Minister di Finansa y Cultura Xiomara Maduro tabata presente na e acto oficial na unda a traspasa e e ex-edifcio di DOW pa Aruba Ports Authority pa asina por inicia su renovacion. Durante e ceremonia aki Minister di Cultura a hiba e siguiente discurso na tur esnan presente:
Awe nochi nos tey akinan pa formalisa e renovacion di e ex-edificio di DOW pa asina por duna inicio na e restauracion di e edificio historico aki. Un edificio cu tin un pasado interesante.
E edificio aki a wordo diseña pa DOW na aña 1949 den un estilo nobo di arkitectura comercial pa por ubica e oficinanan di DOW aden. E tempo ey e kantoornan di DOW tabata situa na Lagoenweg 11. Durante e temporada ey cu establecimento di Lago, economia di Aruba a crece. Consecuentemente e trabounan administrativo y e trabounan na DOW tambe a aumenta. Esey a trece cune cu DOW mester a muda pa bay un edificio mas grandi y moderno.
E edificio aki a wordo construi pa e contratista Ramon Montaner y a wordo construi den dos fase. E parti mas na noordoost a wordo construi den e prome fase y e parti cu ta duna pa Paardenbaaistraat a wordo construi den e di dos fase na aña 1954.
Un caracteristica notabel di e arkitectura entre 1930 y 1950 tabata cu e daknan cu panchinan di ceramica y nan tabata sali for di e gevel di e edificionan. Pero door di scarsedad di material di construccion door di Segundo Guera Mundial e daknan mester a wordo cubri despues cu panchinan di metal, eterniet y asfalt. E edificionan construi durante e periodo aki tabata construi teniendo cuenta cu e clima. Asina ta traha e edificio pa laga luz y aire pasa y proteha riba e calor di e solo pa controla e clima paden di e edificio. E edificionan aki a wordo construi cu arkitectura y ta forma un grupo di arkitectura diferente di e construccion cu nos conoce normalmente na Aruba.
Den e edificio aki e oficinanan di DOW a keda te na aña 2009. Despues DOW a muda pa bay Wayaca y e edificio a keda pa 15 aña bashi.
E edificio a wordo proclama como monumento na aña 2010. Actualmente Aruba tin 39 monumento y tin 288 peticion riba lista pa bira un monumento.
Como Minister di Cultura mi ta masha contento cu e edificio aki porfin ta bay wordo restaura pa asina por conserva su historia.
Ta masha importante pa preserva e monumentonan aki, ya cu nan ta e herencia cultural di nos pais. Nan ta testigonan di nos pasado, cu ta conta e historia di nos Pais. Conserva nos monumentonan ta nifica preserva nos identidad. E edificio historico aki ta refleha nos cultura, nos manera di biba y traha den pasado. Ora nos ta conserva e edificio nos ta sigura cu e historia ta keda pa nos futuro generacionnan.
Monumentenbureau ta stimula preservacion di monumentonan di nos pais y tambe ta stimula educacion y conscientisacion tocante e importancia di nos monumentonan y arkitectura como parti esencial di herencia cultural di Aruba. Ademas nan ta maneha e proceso pa conserva y duna permit na ora di restaura of mantencion di nos monumentonan, e expertonan aki tin e trabou di investiga y analisa e edificionan pa preserva parti di e historia arkitectonico pa asina e partinan di pasado no bay perdi.
Mi ta sumamente contento cu e edificio aki, strategicamente ubica den nos Centro di Cuidad, pronto ta bay bira cas di nos departamento di turismo Aruba Tourism Authority (ATA), Aruba Port Authority (APA) y Monumenten Bureau. Un bon escoho pa ATA y APA, ya cu e edificio ta bon ubica caminda e turistanan ta trafica y tambe cu un bon bista riba waf. Alabes e ta bay aloha oficinanan di Monumentenbureau, un departamento importante cu ta traha na beneficio di mantencion di nos monumentonan.
Monumentenbureau ta bay guia e restauracion y mi ta confia cu den man di e expertonan aki e restauracion ta keda ehecuta riba un nivel halto y ta cumpli cu e reglanan pa edificio monumental.
Un danki ta bay na tur instancia cu ta coopera cu e trabounan di restauracion y mi ta desea nan hopi exito cu e trabaounan.
Minister di Cultura a finalisa su discurso: “Pronto nos tur y Aruba por ta orguyoso cu nos lo tin un otro joya di monumento restaura den tur su gloria, pa e conta nos su historia”.