ORANJESTAD: Diamars ultimo, Seleccion Masculino di Futbol di Aruba a yega Aruba. Minister di Enseñansa y Deporte Endy Croes a ricibi nan na yegada den e VIP room di Aeropuerto Internacional Reina Beatrix. Manera ta conoci, Seleccion Masculino di Aruba ta enfrentando Seleccion di Corsou den FIFA World Cup Qualifiers na Compleho Deportivo Guillermo Prospero Trinidad diasabra awo. Despues di e caluroso encuentro aki, Minister Endy Croes hunto cu Arubaanse Voetball Bond (AVB) y diferente liga a acudi na Double Down Restaurant na Eagle Resort, unda por a comparti un tempo ameno cu Seleccion di Aruba. Minister Endy Croes a gradici capitan di Seleccion di Aruba Sr. Fernando Lewis y bondscoach Sr. Marvic Bermudez pa e gran trabou cu nan ta haciendo. Ademas di esaki, e mandatario di Deporte ta desea nos Seleccion di Aruba hopi exito diasabra awo, 8 di juni. Alabes ta invita Pueblo di Aruba bin apoya nos Seleccion Masculino di Futbol diasabra awo, cuminsando 8 or di anochi den Compleho Deportivo Guillermo Prospero Trinidad.
