Home » Horacio Oduber Hospital orguyosamente ta habri Cas di Dokter Piedra Plat

Horacio Oduber Hospital orguyosamente ta habri Cas di Dokter Piedra Plat

Establecimento nobo cu servicio di prikpost LABHOH

by Admin
0 comment 78 views

 

 

 

 

Horacio Oduber Hospital (HOH) a celebra recientemente e apertura di e di dos establecimento Cas di Dokter Piedra Plat dirigi pa HOH. Hospital a habri e prome localidad algun aña pasa na Eagle y awo e di dos ta habri su portanan oficialmente na Piedra Plat. Sr. Gregory  Croeze, Miembro di Hunta di Directiva HOH , a expresa cu awo tin dos dokter di cas den servicio di Cas di Dokter Piedra Plat y cu pa fin di aña lo amplia e cantidad di dokter na cuater. Ademas lo tin un Praktijkondersteuner Huisarts (POH) y tambe tin un prikpost di LABHOH situa na e Cas di Dokter Piedra Plat cu amplio luga pa parkeo . 

 

A habri e bunita atardi aki cu presencia di invitadonan unda nos minister di Turismo y Salud Publico, sr. Dangui Oduber a dirigi algun palabra terminando cu “e apertura aki ta un paso mas cu Aruba ta tuma den loke ta cuido medico cu ta enfoca un bes mas riba calidad di cuido pa nos pashentnan.” 

 

Sr. Croeze a splica cu: “OE AZV a acerca nos algun luna pasa cu e pregunta si Hospital ta dispuesto pa habri un di dos localidad di Cas di Dokter. Nos a reuni internamente tocante e peticion aki y no a tarda mucho cu nos a regresa cu un contesta positivo. Cas di Dokter ta un servicio cu ta cuadra cu e vision di HOH. Habriendo un Cas di dokter den bario ta haci nos como HOH mas cerca di y accesibel pa e communidad.”

 

Prome cu e conteo oficial pa asina corta e cinta sr. Edwin Jacobs, director di OE AZV tambe a dirigi algun palabra y a termina bisando:“ masha danki HOH pa e man cu a duna nos pa asina nos logra fortifica e prome liña di cuido na Aruba.” 

 

E momento simbolico di cortamento di cinta a tuma luga despues di e diferente palabranan cu a hiba pa tur esnan presente y tur invitadonan por a drenta y sera conoci cu e bunita establecimento nobo di Cas di Dokter Piedra Plat. 

 

Hunta di Directiva di HOH ta gradici tur esnan cu a haci cu apertura y servicio aki por a bira un realidad, cuminsando na Ministerio di Turismo y Salud Publico, OE AZV cu a percura pa financia e Cas di Dokter, Hunta di Supervision di HOH, coleganan di Cas di Dokter pa e sosten y na e coleganan di hospital pa aporta grandemente na e logro aki.

 

Hospital ta haci tur lo posibel pa por brinda mas opcion di cuido posibel pa facilita e pashent. Door di crea mas localidad di Cas di Dokter den otro barionan, ta comparti ekipo, personal y conocemento, banda di un relacion estrecho cu hospital den caso cu mester brinda cuido medico specialisa y urgente. Siendo e entidad cu mas profesional den cuido den servicio, semper por intercambia di conocemento y dokter na momento cu ta necesario. Paso manera sr. Croeze a termina bisando, manera HOH su lema ta indica nos semper t’ey, y awo mas cerca dibo.” 

 

FIN

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio