Sero Patrishi – Diahuebs den oranan di atardi, por bisa algo prome cu 6’or polis a bay pura Sero Patrishi.
Ariba e caminda cu ta bay pa Glenn’s Place nan ta haya un auto poco ariba caminda, porta habri y danjo na e windshield.
Den e caya cerca di e auto, eynan ta unda nan a bin topa cu un homber ariba suela, seriamente herida y sangrando.
Testigonan a conta polis kiko nan a mira.
Ta asina cu a papia cu un grupo a maltrata e homber. E bringamento lo a cuminsa unda e auto tawata, y poco poco a keda hala bay mas leu.
Segun un testigo a conta nos, e homber no por a defende su mes y tawata haya golpi nan fuerte cu a tumb’e y kizas esaki a causa tambe cu e lo a dal su cabes habri esaki.
Polis tawata trata na comunica cu e homber, pero no tawata facil debi cu su lenga tawata pisa.
Otro unidadnan policial cu a yega a bay tira bista rond pa wak si por haya esnan culpabel.
Na e sitio testigonan a yuda polisnan mas cu nan por, door di bisa locual nan a presencia.
Paramediconan cu a yega, mesora a lanta e homber y pone den ambulance unda cu despues di un rato a sali direccion Hospitaal.
Departamento tecnico y recherche a wordo avisa di e caso serio aki.
Kiko por a conduci na e maltrato aki combina cu robo no ta conoci. Esey ta e cabayero ora e por papia bon bek lo splica autoridad.
