Staten van Aruba
16 mei 2024
Apreciabel voorzitter,
Mi a tuma nota di e carta di colega Miguel Mansur pidiendo un reunion di CHA pa considera ontslag di Griffier di Staten, mr. Herman Hek. E peticion aki simplemente ta un reaccion riba e resultado di e reunion publico di dia 8 di mei 2024 pa trata e ley di matrimonio homosexual. E dia ey Miguel Mansur, Marisol Tromp, Mervin Wyatt-Ras y Gerlien Croes a bira hopi altera rond di e cuestion di e posibilidad di abstencion y su efecto riba e votacion y awor e ta cuestiona señor Hek su integridad y competencia pa informa Staten encuanto e reglanan tocante votacion. Mansur c.s. no tabata habri pa ningun discusion racional y ya caba tabata lansa yen acusacion y menasa durante reunion di dia 8 di mei y despues di e reunion nan a sigui riba mesun pia. Sin ningun base Gerlien Croes a acusa MEP y AVP riba Facebook di a haci un complot pa perhudica e ley di pasa. Mansur na su turno a menasa Arthur Dowers cu e no por bira minister di Husticia den un gobierno di Accion21, pasobra Dowers a vota contra e ley y segun Mansur e voto contra tabata un violacion di nos Constitucion.
Ta importante pa señala cu – independientemente di e hecho cu Mansur aparentemente no ta compronde e regla di colision cu ley mas halto ta prevalece sobre ley mas baho (lex superior derogat lege inferiori) – Mansur den su carta no ta duna ningun evidencia con Griffier a gaña y cu el a actua cu intencion di engaña. Asina kier castiga Griffier completamente basa riba speculacion. Ademas ta importante pa splica e reglanan manera nan ta y splica e manera con dia 8 di mei 2024 e bloke di Miguel y Marisol a haci politikeria cu cuestion di abstencion di voto durante un reunion publico.
Abstencion y su efecto riba e votacion
Tin dos regla cardinal pa un reunion publico: (1) mester tin por lo menos 11 parlamentario pa por reuni durante henter e reunion y (2) e mayoria di e votadornan ta dicidi riba proposicionnan. Durante e votacion un parlamentario por abstene di vota. Den e caso ey e abstencion no ta conta como voto na fabor of contra. Esey ta nifica cu e abstencion no tin influencia riba e resultado final di e votacion.
Si 21 parlamentario t’ey den un reuniony 10 ta vota PRO, 8 ta voto CONTRA y 3 ta abstene. E proposicion ta keda aproba cu 10 voto PRO y 8 voto CONTRA.
E motibo pakico abstencionnan no ta conta, ta pa no castiga e votante neutral. Un hende por scohe pa abstene pa motibo di no ta sigur di lo que nan ta opina riba un propuesta. Si e abstencionnan tabata conta como voto CONTRA, e personanan aki ta wordo obliga pa tuma un posicion cu nan no ta sinti nan mes comodo cu ne.
Eror den e pensamento di e bloke di Miguel y Marisol
Miguel y Marisol a presumi cu hopi hende di parti di MEP lo a abstene di vota pa warda e veredicto den Cassatie. Tambe nan a asumi cu Dowers lo a vota PRO. P’esey nan a spera un resultado hopi diferente:
⦁ 7 voto CONTRA: do Nascimento, Berlis, Tevreden, Hoek, Guedez-Erasmus, Molina y Eman;
⦁ 4 abstencion: Yarzagaray, Tromp Lee, Vrolijk y Vallejo;
⦁ 10 voto PRO: pasobra nan tabata contando riba e sosten di Dowers.
Kiermen cu nan tabata spera un victoria confortabel di 10 voto PRO y 7 voto CONTRA.
Panico pa perde
Den e senioren convent voorzitter a parti un documento den cual a resumi e leynan importante cu ta goberna e reunion. E documento tambe tabata contene opinionnan di un commissiegrifier di Hulanda, griffier di Sint Maarten y director di DWJZ. Dos parti den e documento a pone e bloke drenta den panico. Un ta unda e commissiegriffier ta splica cu na Hulanda nan ta vota door di hisa nan man. Esey kiermen cu si bo no vota PRO door di hisa bo man, automaticamente bo ta wordo conta como di a vota CONTRA. P’esey, si un parlamentario Hulandes kier abstene di vota e mester bandona sala. Ta importante pa señala cu mientras na Hulanda ta custumber pa vota door di hisa nos man, na Aruba nos custumber ta di vota door di bisa e palabra “PRO” of “CONTRA”.
E otro parti di e documento cu a trece panico ta unda cu e director di DWJZ ta bisa cu tur hende mester vota, pero cu bo no por obliga ningun hende di vota. Si nan ta keda sinta den sala toch “bo por cont’e den e total di stemmen pa determina e volstrekte meerderheid”. E interpretacion cu e bloke Miguel y Marisol a duna na e documento ta cu voorzitter lo conta tur abstencion como voto CONTRA. Di biaha nan a mira un pelicula di teror den nan cabes: nan a soña cu voorzitter lo a conta e 7 voto CONTRA hunto cu e supuesto 4 abstencion. Den nan mente nan a scucha Edgard Vrolijk anunciando 10 PRO y 11 CONTRA: e ley a keda rechasa.
E atake di Marisol
P’esey Marisol Tromp a lidera un atake riba e voorzitter. Marisol a keda bende e idea cu MEP kier a sabota e resultado di e votacion y cu Vrolijk tabata planeando pa viola un regla legal hancra den nos Constitucion y Reglement van Orde. Marisol a bisa cu e regla legal ta cu esun cu kier abstene di vota tin e obligacion legal pa bandona sala di parlamento.
Sin embargo, esaki no ta nada mas cu un regla spirito. Ora bo ta lesa henter nos Constitucion y henter nos Reglement van Orde di Parlamento bo no por haya ningun regla asina. Como cu Marisol no por mustra den cual articulo su supuesto regla ta para, e ta bisa: esey ta e custumber, semper nos a haci e asina. Asina Marisol ta zona mescos cu Paul Croes, Benny Sevinger y Otmar Oduber ora ta trata di practicanan coruptivo: semper nos a haci e asina. So what…?
El tiro les salio por la culata
Henter e discusion aki ta estupido y no ta haci ningun sentido. E dolo no ta e cuestion di abstencion di voto. E motibo pa busca revancha riba Griffier ta cu Miguel no tabatin 11 voto PRO y p’esey su ley no por a pasa.
Atentamente,
Ryçond Santos do Nascimento
Miembro independiente di Parlamento