ORANJESTAD: Siman pasa, Minister Endy Croes a atende reunion cu Comision di Restruccion Salarial di e Maestronan. Manera ta conoci, e comision aki a ser estableci na inicio di october 2023 a traves di un Ministeriële Beschikking (MB). E comision ta consisti di un representante di Ministerio di Enseñansa y Deporte y abogado Sr. Milko Baiz, directora di Departamento di Enseñansa Aruba (DEA) Sra. Anne Marie Proveyer, director di Dienst Uitvoering Onderwijssubsidies (DUOS) Hervé Ruiz, presidente di SIMAR Sra. Angelique Quijada y register accountant Sr. Franklin de Kort. Durante e encuentro cu e comision aki a trata posibel modelonan y structura moderno di salario pa e docentenan y otro temanan importante riba e veld di enseñansa. E mandatario di Enseñansa a indica cu el a ricibi e conseho final firma cu ta conta cu sosten di tur cinco (5) miembro di e comision esta, SIMAR, Departamento di Enseñansa, abogado, DUOS y register accountant. Minister Endy Croes a enfatisa cu manera a atende cu indexering asina e ta desea di atende cu cuestion aki. E mandatario di Enseñansa ta cauteloso y no a bay den detaye di e conseho cu el a ricibi. E conseho tin un proceso pa cana, e siguiente paso ta pa pidi conseho di Departamento Recurso Humano (DRH). Minister Endy Croes a indica cu mester busca espacio financiero y despues lo presenta esaki na Conseho di Minister. “Ohala cu dia trata e Presupuesto di Pais Aruba pa aña 2025 na luna di december proximo, por tin algo concreto y tin un espacio adicional banda di 11.7% di indexering cu e docentenan a ricibi”, Minister Endy Croes a expresa. Banda di esaki, Departamento di Enseñansa tin un comision cu ta trahando riba e “richtlijnen” nobo pa enseñansa den su totalidad. Un ehempel ta e deseo ta pa baha e cantidad di mucha den klas di 28 pa muy probablemente 24 mucha den klas. Minister Endy Croes a indica cu pa luna di juni of juli proximo e lo ricibi e conseho final di e “richtlijnen” nobo cu lo regla diferente aspecto den enseñansa na beneficio di e docentenan. Minister Endy Croes a subraya un bes mas cu e ta aprecia e gran trabou cu e docentenan ta haci den nos comunidad. Pa conclui, minister di Enseñansa a indica cu e ta trahando duro pa mehora diferente aspecto den enseñansa.