Home » Minister Glenbert Croes: DESEMPLEO TA SIGUI BAHA TE NA 4% DEN 2023

Minister Glenbert Croes: DESEMPLEO TA SIGUI BAHA TE NA 4% DEN 2023

by Admin
0 comment 61 views

Danki na iniciativanan di Gabinete Wever-Croes pa cu e mercado laboral,

ORANJESTAD – Dialuna mainta durante conferencia di prensa di Gobierno, Minister di Labor a anuncia e grato noticia cu e porcentahe di desempleo pa aña 2023 a baha te na 4%. Esaki sigur ta un noticia agradabel, mirando tur e iniciativanan cu Gabinete Wever-Croes a bin ta haciendo pa e mercado laboral.

Minister Croes a splica cu desde cu Gabinete Wever-Croes a asumi encargo di gobernacion di pais Aruba, e cifra di desempleo a desaroya positivamente. Na inicio di gobernacion na 2017, e porcentahe di desempleo tabata na 8.9%. Gobierno a cuminsa traha y bin cu iniciativanan pa cu e mercado laboral, rebahando e porcentahe aki na 2018, te na 7.3%, y na 2019 te na 5.2%.

Lamentablemente na 2020, Aruba a haye confronta cu e pandemia global di Covid-19, cu a conduci un subida grandi den e porcentahe di desempleo. Apesar cu e cifra di 8.6% ta uno halto, considerando e impacto desastroso cu e pandemia aki tabata tin riba pais Aruba, e cifra por tabata pio.

Na momento cu Aruba a conoce su prome caso di covid-19, Gobierno a haye den un situacion na unda mester a sera e frontera, evitando asina cu bishitante por drenta pais Aruba. Mirando cu turismo ta e pilar di nos economia, e decision aki pa protehe e ciudadanonan di pais Aruba, tabata tin un efecto desastroso riba e economia. Si no ta pa e subsidio di salario na comercio, fondo di asistencia social di emergencia, apoyo na companianan mediano y chikito etc., e resultado di e cifra di desempleo lo por tabata pio.

Minister Croes a indica cu na 2021, e cifra a subi na 8.8%, pero danki na e recuperacion economico di pais Aruba, na aña 2022, a conoce un rebaho den e cifra di desempleo. E cifra aki di 4.3%, ta un muestra di tur e iniciativanan cu gobierno a bin cune pa e mercado laboral. Gobierrno a enfoca na pone nos hendenan local prome na trabou, y tambe a bin cu un politica di integracion na unda a duna esnan cu tabata fisicamente na Aruba e oportunidad pa legalisa nan mes, aportando asina na e caha di gobierno.

“Cu hopi orguyo, mi ta anuncia awe, cu danki na tur e trabounan duro di e gobierno actual, e cifra di desempleo pa aña 2023 ta na 4%. Esaki sigur ta trece cune un sentimento di satisfaccion, pa sa cu tur nos esfuerso durante añanan pa yuda nos ciudadanonan tin un miho bida, ta dunando su fruto” Minister Croes a expresa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio