ORANJESTAD: Durante Conferencia di Prensa di Gobierno di Aruba dia 25 di april 2024, Minister di Enseñansa y Deporte Endy Croes a duna informacion di e desaroyonan cu ta tumando luga na Compleho Deportivo Guillermo Prospero Trinidad na Dakota. Manera ta conoci, Compleho Deportivo Guillermo Prospero Trinidad ta den proceso di renobacion desde aña 2023. E compania cu ta haciendo e parti concreto ta bashando e tribuna e siman aki. Tin un otro compania cu ta encarga cu e parti di electricidad, cual mester reinstala. Banda di esaki, e compania AstroTurf a aloca e turf nobo cu ya ta certifica pa FIFA pa e proximo 10 añanan. Recientemente, a baha e ocho (8) postenan di luz y a transporta nan na otro sitio pa drecha nan completamente y lo instala e luznan bek den e luna di mei. A inverti den e luznan marca Philips cu ya caba a yega Aruba. CONCACAF y FIFA a exigi luz di minimo 800 lux. Pues awo e stadion lo conta cu luz cu suficiente iluminacion pa cumpli cu e standardnan internacional. Antes e stadion tabata conta cu luz di solamente 150 lux. Ta planifica pa finalisa esaki den e luna di mei. Minister Endy Croes a indica cu dia 8 di juni 2024, Aruba su Seleccion Masculino lo enfrenta Corsou den Compleho Deportivo Guillermo Prospero Trinidad den oranan di anochi estrenando e luznan nobo. Mientrastanto, a remove e atletiekbaan pa cuminsa cu e proceso di renobacion den e luna di juni despues di e campeonato di FIFA World Cup Qualifiers dia 8 di juni 2024. Ta premira cu den e luna di augustus lo finalisa e parti aki y den e luna di september e inauguracion oficial lo tuma luga.
