Home » Exitoso Ban Topa cu studiantenan na Den Haag

Exitoso Ban Topa cu studiantenan na Den Haag

by Admin
0 comment 79 views

 

 

Den Haag  – Gabinete di Minister Plenipotenciario a tene un exitoso Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.

 

Un cantidad di mas cu 30 studiante a participa na e Ban Topa cu a consisti di un discurso di Minister Plenipotenciario Ady Thijsen. Minister Thijsen a duna un splicacion riba e vision y maneho di Gabinete di Aruba cu ta basa riba cinco pilar. Dirigi riba e studiantenan presente den e sala, Minister Thijsen a vocifera su deseo pa nos studiantenan bai bek Aruba, mirando e “vergrijzing” unda hopi hende ta bai cu pensioen y e cuponan di trabao aki mester wordo yena. Tambe e hecho cu tin proyectonan, manera hotelnan nobo, cu ta rekeri trahador. ‘Nos tei como Gabinete pa duna e apoyo y sosten na bosonan. Uno, nos tin un compromiso cu otro unda nos ta bai haci todo lo posibel pa nos por yuda boso den esaki. Pero mester tin un intercambio. Nos mester di boso, boso mester di nos, Aruba mester di boso. Y esaki a base di confiansa. Nos kier pa Aruba bai dilanti y esey ta exigi traha cu otro’, tabata e palabranan di Minister Ady Thijsen.

 

Despues e programa a sigi unda e seccion di dialogo a sigi unda e grupo di studiantenan a haya algun pregunta pa asina recohe pensamentonan, ideanan, sugestionnan unda Gabinete di Aruba lo por sigi traha riba maneho hunto cu ministerio di Enseñansa di Aruba pa stimula e desaroyo y bienestar di studiantenan Arubiano na Hulanda.

 

Directora di Departamento di Recurso Humano (DRH) Omaira Lares a tene un discurso unda ela splica e maneho y plannan cu Gobierno di Aruba ta hiba riba recurso humano y kico esaki ta nifica pa studiantenan ora cu nan caba y ta desea di bai bek y traha na Aruba.

 

Minister di Finanzas y Cultura Xiomara Maduro a tene un discurso hopi bunita, unda ela enfatisa e aspectonan positivo di bai bek Aruba y di e manera ey contribui na e desaroyo di Aruba cu lo mester bin di nos mes hendenan.

 

Gabinete di Minister Plenipotenciario por mira bek riba un Ban Topa hopi exitiso, na unda pa medio di dialoga a tene un intercambio habri cu e studiantenan pa asina sigi conecta y reforza y relacion entre Gabinete di Aruba y studiantenan Arubiano.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio