MINISTER ENDY CROES TA FELICITA ATLETA OLIMPICO ROSHENDRA VROLIJK CU A RICIBI RECONOCEMENTO OLY DURANTE PREMIO EXCELENCIA DEN DEPORTE

ORANJESTAD: Durante Premio Excelencia den Deporte 2023, a reconoce cuater (4) atleta olimpico pa nan gran trayectorio y promove e balornan olimpico. Roshendra Vrolijk a ricibi un certificado y pin di Olympians for Life (OLY) for di man di presidente di Asociacion Arubano di Atletanan Olimpico, Sr. Isnardo Faro. Roshendra a participa cu su 15 aña di edad y te cu awo e ta e atleta di mas hoben cu a yega di participa pa Aruba na e Weganan Olimpico, den e deporte di landamento den e evento di 50 meter “freestyle” na e Weganan Olimpico na Sydney, Australia na aña 2000 y 4 aña despues na e Weganan Olimpico na Athenas, Grecia. Fuera di esaki, Roshendra a participa na aña 2003 den FINA World Championships na Barcelona, Spaña; na aña 2003 den Central American and Caribbean Swimming Federation (CCCAN) na Mexico y na Weganan Panamericano na Santo Domingo; na aña 2002 na ODESUR na Belem, Brasi; na aña 2002 CISC na Corsou y na aña 2001 na CCCAN na Santo Domingo. Un di e caracteristacanan di Roshendra ta su determinacion, cual a hib’e pa tin un trayectoria exitoso. Minister di Enseñansa y Deporte Endy Croes ta felicita Roshendra Vrolijk cu su reconocemento OLY y ta gradicie pa contribui den e desaroyo di deporte di Aruba.