Den Haag – Gabinete di Minister Plenipotenciario a duna reconocemento na tres baluarte Arubiano na Hulanda, durante di Arubadag den De Broodfabriek na Rijswijk. Un momento adecua pa duna balor na nos hendenan na Hulanda cu a haci un contribucion grandi pa e comunidad Arubiano na Hulanda como tambe e comunidad Hulandes.
E prome persona pa a ricibi un reconocemento ta Meda Camacho, cu a nace na Savaneta y ta bin di un famia hopi musical. Cu su 19 aña Meda a conoce e amor di su bida cu tabata staciona na Marinierskazerne, nan a bin Hulanda y na Amersfoort nan a casa y a cuminsa un famia di dos yui homber. Despues cu su esposo a muri na edad jong, ela dicidi pa studia na Sociale Academie De Horst y a bai traha principalmente cu casonan di voogdij. Pa cuater aña ela tabata gemeenteraadslid pa D66 na Amersfoort.
Den e periodo aki Gabinete di Aruba a pidi su yudansa cu e famianan di e victimanan di e Desaster di Bijlmer. Na 2004 ela baha cu pensioen, pero a keda haci hopi trabao voluntario.
Minister di Cultura Xiomara Maduro a haci entrega di e reconocemento na señora Meda Camacho.
E di dos reconocemento a bai pa Jack Rasmijn. Jack a caba su HBS na Aruba y cu un beurs a bai studia na Anton Rosdorg MTS na Den Haag. Despues di su dienstplicht ela cuminsa traha na 1962 na e compania Siemens Nederland BV.
Durante añanan ela ocupa diferente funcion den Siemens na Hulanda, Bruselas y München, Alemania. Mientrastanto e persona aki a cuminsa cu trabaonan voluntario, specialmente dirigi riba hendenan di edad. Te ainda e ta den directiva di Platform Allochtone, cu ta un “adviesorgaan” di e College di B&W di Den Haag y esaki tambe ta conta pa Ouderen y Stedelijke Ouderen Commissie. Y ainda tin mas organisacion cu por conta riba su participacion. Minister di Labor Glenbert Croes a entrega e reconocemento na señor Rasmijn.
Por ultimo a duna un reconocemento na Rossini van Wijk, nasi na San Nicolaas. Rossini tabata den Aruba su Carnaval desde mucha. Pronto ela cuminsa diseña pa Reinanan, individualnan y gruponan di Carnaval, ganando tur sorto di premionan. Tambe Rossini tabata envolvi cu e agencia di modelahe Di Aruba Moda. Awendia Rossini tin su grupo di Carnaval na Hulanda, esta Kingdoms Under The Sun, ya pa 22 aña. Rossini su grupo y Reinanan semper ta representa Aruba rond Europa y e tin dos Reina di Carnaval International.
Rossini tambe ta diseña National Costumes pa Reinanan di beyesa pa Aruba, Hulanda, Curaçao, Belgica, Luxemburg, y Francia, y a gana ocho biaha caba Best National Costume pa Hulanda. Rossini ta sigui keto bay cu Carnaval na Aruba y Hulanda, semper representando Aruba su dushi Carnaval. E reconocemento na Rossini van Wijk a keda entrega pa Minister Plenipotenciario Ady Thijsen.
Asina Gabinete di Aruba a rindi honor na nos hendenan cu a duna nan contribucion na e comunidad Arubiano na Hulanda, como tambe na e comunidad Hulandes. Un pabien cu e reconocemento akin a Meda Camacho, Jack Rasmijn y Rossini van Wijk.
Potretnan cortesia di Arubahuis/ fotografo Michel Groen