Camacuri – Diadomingo anochi pasa di 11’or tanto ambulance y polis a sali direccion Camacuri, pa ta mas exacto altura di Aruba Bank.
Eynan un peaton a wordo alcansa pa un vehiculo.
Paramediconan cu a yega mesora a drenta accion, mirando e situacion di e hende homber. Dos unidad di Ambulance a yega, y Paramediconan a duna di nan parti tur locual cu tawata por pero lamentabelmente e persona ta fayece.
Polisnan ta topa cu e auto un Kia Sportage color preto. E chauffeur a bay para basta mas pabou. Na e sitio despues di a wordo controla pa Paramediconan den ambulance e chauffeur a wordo deteni. Posiblemente pa haci check di alcohol of kizas polisnan lo por a haya holor di alcohol ariba dje.
Transportwagen a yega y na un manera no comun a medio tapa e persona pa publico no wak e, e motibo pakiko e la bay asina no ta conoci.
Tur e instancianan concerni a wordo poni na altura pa presenta na e sitio, manera e propio Comisario Arnhem a yega, y otro demas departamentonan.
Dokter Texier 11:45 p.m a yega y hunto cu polis ta constata morto di A.J.B. 54 aña naci Brazil.
Polis no por haya famia di e fayecido y Cuerpo Policial ta haci un apelacion na famia di e fayecido pa por tuma contacto cu e central di polis yamando na e number di telefoon 100, pa asina departamento di trafico por tuma contacto cu nan.
Arubanative.com ta manda palabra di condolencia na famia y conocirnan di e fayecido.
