Home » DIA DI TERA APRIL 22

DIA DI TERA APRIL 22

by Admin
0 comment 94 views

 

HISTORIA DI DIA DI TERA 

Cu un foto di Tera tuma for di espacio abordo di Apollo 11, John McConnell, un activista mericano  ambiental, ta crea e bandera cu ta bira e simbolo universal conoci como Earth Flag.  Pa eleva sosten individual y internacional pa cuido di planeta Tera McConnell a propone un Dia di  Tera y e esaki ta haña acogida y a ser sigui pa un Proclamacacion di Dia di Tera pa e ciudad di San  Francisco. 

Ta 21 maart 1970 y e prome Dia di Tera, manera proponi pa McConnell, ta ser celebra na San  Francisco. 

Mientras tanto preparacionan masivo ta na caminda, encabeza pa Gaylord Nelson, un senador  mericano di Wisconsin, kende ta propone e prome protesta ambiental nacional pa sacudi e mundo  politico y forza e tema di medio ambiente riba e agenda nacional. 

Riba 22 april 1970, 20 miyon mericano ta subi caya, aglomera den parke y auditorio pa demonstra  pa mustra e necesidad di un medio ambiente sano y sostenibel. Denis Hayes, e coordinador  nacional y su equipo a organiza reunionan popular masivo di costa pa costa. Miles di skol y  universidad a organiza protesta contra e deterioro di e medio ambiente y gruponan ambiental,  republicano, democrata, agricultor y lidernan sindical a uni pa un causa comun, creando un empuhe  cu a conduci na crea e Environmental Protection Agency y aceptacion di e leynan Clean Air, Clean  Water, y Endangered Species Acts. 

Desde 1990 ora Earth Day Network a ser crea pa Denis Hayes pa promove Dia di Tera mediante un red internacional di organisacion, Dia di Tera a crece bira e evento mas celebra na mundo,  conmemora pa mas hende cu cualkier otro evento secular, religioso of dia nacional riba planeta  Tera. 

E fecha pa celebra Dia di Tera ta bira oficialmente 22 April asina remplazando e fecha original pa e  otro Dia di Tera anteriormente proponi pa John McConnell. 

Na 2009 cu Resolucion A/RES/63/278 Asamblea General di Nacionan Uni ta declara 22 april  International Mother Earth Day y Earth Day Network ta asumi coordinacion global di Dia di Tera. 

DIA DI TERA NA ARUBA 

Dia 22 april 1993, Accion Ambiental, un grupo di cuater hende (Milton Ponson, Marcos Bislip,  Sandra Robles y Sheila Lampe) hunto cu Fundacion Desaroyo Ecologico Aruba a tene un rueda di  prensa y a reflexiona riba e necesidad pa proteha nos planeta, su recursonan natural y  ecosistemanan y pa transmiti e mensahe aki na e hubentud di Aruba. 

Na 1994, Dia di Tera a bira un evento nacional na Aruba, ora cu a hisa e Earth Flag na Biblioteca  Nacional Oranjestad riba 22 april. Gobernador di Aruba tawata presente y Prome Minister Nelson  Oduber a hiba un discurso pa e publico presente. Ariba e mesun dia un rueda di prensa a ser teni cu e tema “Nos Recursonan Natural ta nos Rikeza Economico”, un brochure a ser presenta, titula  “Aruba, One Natural Island” y Accion Ambiental a anuncia cu lo manda un delegado pa participa den e Global Conference on the Sustainable Development of Small Island Developing States na  Barbados e mesun aña. 

Pues e aña aki danki na Fundacion Accion Ambiental y desde 2002 tambe oficialmente via Rainbow Warriors Core Foundation ta marca 30 aña di celebracion di Dia di Tera y nos ta dedica e dia aki na  memoria di Sheila Lampe, luchador pa naturaleza cu a bay laga nos e aña aki 

TEMA PA 2024: Planeta vs. Plastico, Reduci Uso di Plastico cu 60% pa 2040 Earth Day Network cu cual desde 1993 tanto Fundacion Accion Ambiental y Rainbow Warriors Core  Foundation a traha estrechamente a pone como tema “Planet vs Plastics: Reduce the Use of  Plastics by 60% by 2040, esta Planeta vs. Plastico, Reduci Uso di Plastico cu 60% pa 2040” Den su mensahe pa Dia di Tera 2024, Secretario-General di Nacionan Uni Antonio Guterres ta  menciona na inicio “Nos ta depende di naturalesa pa nos cuminda cu nos ta come, e aire cu nos ta  respira y e awa cu nos ta bebe. Sin embargo, nos a crea chaos den e mundo natural: nos ta  venenando nos planeta cu contaminacion, eliminando especie y ecosistema den forma descabeya y destabilizando nos clima cu emision di gasnan invernadero” 

Fuera di cambio climatico un di e impactonan mas negativo cu ser humano ta causa ta e polucion di  plastico. 

Pa na Aruba nos cumpli cu e tema di e aña aki nos por cuminza cu elimina TUR awa, refresco,  bebida y producto di cuminda empaketa den botter di plastico. 

E keda estableci cientificamente cu botter di plastico ta produci micro y nanoplastico cu ta ser ingeri  ora nos come e cuminda of bebe e likido enboteya den plastico. 

Plastico cu ta caba como polucion den laman tambe ta drenta e cadena alimentario marino via micro y nanoplastico y ta termina den productonan alimenticio di laman pa consumo humano. 

TEMA ADICIONAL: SOBREDESAROYO DI TURISMO TA CABANDO CU PAISNAN E sobredesaroyo di turismo a provoca multiple protesta masal e siman aki na e Islas Canarias  contra turista, cu segun e habitantenan cu ta protestando ta cabando cu nan país. Aki na Aruba pronto nos lo por spera protesta similar ora Gobierno NO para e proyecto Secrets  na Seroe Colorado cu lo caba cu Baby Beach, Rodgers Beach e islanan di bubi dilanti costa y  lo destrui Santana di Cacho na unda miles di mascota stima a haña nan ultimo lugar di  descanso. 

Documentonan den poder di varios periodista y medio di comunicacion investigativo y Rainbow  Warriors Core Foundation ta indica cu den otorgamento di permiso pa construccion a tolera yen di violacion di ley, roza tereno sin permiso previo (ontheffing) y a omiti hopi criterio entre otro di  proteccion di naturalesa pa permiti un hotel ALL-INCLUSIVE di 600 camber ser construi cu lo  

caba cu naturalesa, paz y trankilidad den Seroe Colorado y contribui ABSOLUTAMENTE NADA na actividad economico pa San Nicolas como hotel all-inclusive. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio