E meta di “Kennismissie” ta pa traha hunto riba cierto aspecto riba nivel di MBO y enseñansa superior di e paisnan di Reino Hulandes.
ORANJESTAD: Diamars mainta, Minister Endy Croes a ricibi bishita di Minister di Enseñansa, Cultura y Ciencia di Hulanda Sr. Robbert Dijkgraaf y delegacion, unda a trata diferente punto cu ta di vital importancia pa enseñansa. Minister Dijkgraaf ta dirigi e proyecto Mision di Conocemento (Kennismissie) cu ta consisti di directiva di 10 instituto di entre otro, mbo, hbo, universidad, experto y representante di entre otro, Academia Real Hulandes di Ciencia. Mision di Conocemento a inicia na Aruba dia 9 di april y lo continua dia 11 y 12 di april na Curaçao. E meta di e proyecto ta pa traha hunto pa reforsa e cooperacion riba tereno di enseñansa entre Aruba, Hulanda, Sint Maarten y Reino Hulandes. Despues di e encuentro cu Minister Endy Croes, Minister Robbert Dijkgraaf y e expertonan a bishita Colegio E.P.I., unda a trata, entre otro, “beroepsopleiding” y con pa conecta e necesidadnan cu mercado laboral. Tambe, a comparti idea y a dialoga con pa haci enseñansa mas flexibel, cu enfoke riba futuro y con pa brinda miho guia na e studiantenan. Ta importante pa determina kico ta funciona y kico no y evalua unda mester busca otro solucionnan. Na final di e Mision di Conocemento lo presenta e conclusionnan, unda cu e paisnan por traha hunto. Despues di un dia basta pisa di trabou cu a inicia den oranan tempran di mainta, Minister Endy Croes a ofrece un recepcion na Universidad di Aruba, unda cu e delegadonan a intercambia conocemento y idea. “Colaboracion ta e yabi”, Minister Endy Croes a enfatisa.
