ORANJESTAD: Diabierna den oranan tempran di mainta, Minister Endy Croes a sali di biahe pa Curaçao riba dos diferente invitacion. Primeramente, e mandatario di Enseñansa y Deporte lo acudi na Universidad di Curaçao pa e ceremonia oficial di entrega di e prome BSN nummer na e prome studiante di Caribe. Manera ta conoci, Minister di Enseñansa di Hulanda Robbert Dijkgraaf tabata na Aruba dia 9 y 10 di april 2024 pa e proyecto Mision di Conocemento (Kenniscomisie). E conferencia a continua na Curaçao dianan 11 y 12 di april, unda cu un delegacion grandi di Aruba, Curaçao, Sint Maarten, y Hulanda ta atendiendo diferente reunion pa traha hunto riba cierto aspecto riba nivel di MBO y enseñansa superior. Ademas di esaki, Minister Endy Croes ta atende Weganan Interinsular, unda cu e hobennan di Aruba, Boneiro y Curaçao ta competiendo den e disciplina di atlestismo, basketball y volleyball. E ceremonia di Weganan Interinsular ta inicia diabierna mainta y ta clausura diasabra anochi. “Pues, dos dia di trabou basta pisa cu un agenda basta carga di trabou, pero cu placer nos lo representa Aruba dignamente”, Minister Endy Croes a expresa. Di regreso na Aruba, Minister Endy Croes lo amplia riba e e biahe di trabou aki.