ORANJESTAD– Riba 26 di maart ultimo Conseho di Minister di Aruba a ricibi un presentacion riba e Metanan Mundial pa Desaroyo Sostenibel. Durante di e presentacion, e ministernan a haya un splicacion con a yega na e SDG’s, con leu Aruba ta riba e proceso di conscientisacion y kico mas Aruba lo tin di haci pa por alcansa esaki.
E presentacion a wordo duna door di señora Pytrik Dieuwke Oosterhof cu a wordo contrata door di Nacionnan Uni (United Nations). Oosterhof ta un consultant di UN ECLAC cu a traha un strategia di comunicacion specialmente pa Aruba. Den e strategia di comunicacion a indica cua ta e pasonan pa tuma tanto den gobierno, sector priva, instancianan gubernamental y no gubernamental. Oosterhof a señala cu e unico forma di alcansa e metanan di e SDG ta pa traha hunto pa crea conscientisacion. E interconexion entre e diferente SDG ta loke ta crea e efecto accelerador pa logra e Metanan Mundial pa Desaroyo pa aña 2030. Mas aleu Oosterhof a sigui splica cu Aruba inconscientemente ta haciendo hopi caba pa logra e metanan aki, pero cu falta di link y comunica riba tur e esfuersonan (maneho, proceduranan, leynan, iniciativanan) na e SDG.
Conseho di Minister di Aruba a keda entusiasma cu e presentacion di e strategia di comunicacion pa crea conscientisacion riba e Metanan Mundial pa Desaroyo Sostenibel di Nacionnan Uni 2030. Y a compromete nan mes pa implementa e strategia pa asina contribui na conscientisa comunidad tocante e Metanan Mundial pa Desaroyo Sostenibel.