ORANJESTAD: Siman pasa, Minister Endy Croes a reuni cu e comision cu ta trahando duro pa por logra cristalisa Museo Betico Croes na retonde di Santa Cruz. E comision ta consisti di diferente stakeholder, entre otro, arkitecto, expertonan di museo y miembronan di e comision. Manera ta conoci, Minister Endy Croes ta trek e proyecto aki den nomber di Gobierno di Aruba. Minister Endy Croes a indica cu tin avancenan positivo y e plan ta basta concreto. “Nos ta mira adelantonan gigantesco pa e proyecto aki”, Minister Endy Croes a indica. E animo di e comision ta halto y ta premira cu e lo bira un proyecto espectacular. Ta premira cu pronto lo finalisa e prome fase y den aña 2024 lo pone e prome piedra. Den e simannan nos dilanti lo sigui brinda Pueblo di Aruba mas informacion di e bunita proyecto aki.