ORANJESTAD, Aruba – Recientemente Royal Aruba Aloe a keda cla cu un “recall” boluntario di algun producto, den e mercado Mericano, pa sigura cu a saca un elemento specifico den nan produccion. Aunke cu a cumpli for di momento cu Merca a cambia nan ley na aña 2021, toch a demanda pa anuncia esaki publicamente. E compania netamente Arubiano ta sigura cu a cumpli cu tur rekisito y cu a adapta nan formula pa tur mercado caba, tambe esun di Aruba.
Dos producto specifico
Royal Aruba Aloe ta distribui su productonan mundialmente. Y rond mundo e reglanan ta diferente y ta cambia regularmente tambe. Asina Royal Aruba Aloe a bende entre otro su producto Hand Sanitizers y Alcoholada Gel na Merca pa hopi aña caba. Esey ta productonan produci cu un alcohol special cu hende no por bebe, door di mescl’e cu un cantidad limita di otro kimico.
Tres aña pasa a cambia e regla
Mayoria productor (y Royal Aruba Aloe tambe) semper a uza Methyl Alcohol pa esey, pero na aña 2021 USA Food and Drug Administration (FDA) a prohibi e uzo di Methyl Alcohol. Royal Aruba Aloe a cambia e formula mesora pa no uza Methyl Alcohol mas.
“Recall” ta un formalidad
Pero, pasobra Royal Aruba Aloe via di su website na Merca a bende e otro Hand Sanitizers caba, FDA a demanda pa Royal Aruba Aloe haci un “recall” boluntario di tur e Hand Sanitizers bendi entre añanan 2021 – 2023. A ehecuta e “recall” na Merca y a public’e den varios medio di prensa na Merca.
Royal Aruba Aloe ta enfatisa cu e recall no ta pa productonan bendi na Aruba y tambe cu tur Hand Sanitizers y Alcoholado Gels bendi den e tiendanan na Aruba no ta contene Methyl Alcohol tampoco.
Pa mas pregunta semper por e-mail [email protected].
Tocante Royal Aruba Aloe
Royal Aruba Aloe, estableci na 1890, ta e prome compania den e parti Caribense di Reino Hulandes cu a ricibi un predicado Real y ta un di e poco companianan di aloe na mundo cu ta crece, cosecha y procesa su aloe na e mesun luga. Nos aloe, considera e miho di mundo, ta e base di un coleccion di producto pa cuido di cuero, cabey y contra solo, cu constantemente ta creciendo. Royal Aruba Aloe awor aki tin 16 tienda na Aruba. Por cumpra su productonan riba www.arubaaloe.com (Merca & Canada) y na www.arubaaloe.nl (Europa).
