Home » ARUBA TA UN “ONE HAPPY ISLAND”, NO TIN LUGA PA TRAFICACION DI HENDE NI PA SCLAVITUD MODERNO

ARUBA TA UN “ONE HAPPY ISLAND”, NO TIN LUGA PA TRAFICACION DI HENDE NI PA SCLAVITUD MODERNO

Prome Minister a reuni cu señora Jeanette Baars di CMMA

by Admin
0 comment 103 views

 

ORANJESTAD – Recientemente, Prome Minister Evelyn Wever-Croes a reuni cu señora Jeanette Baars di Coördinatiecentrum Mensenhandel Mensensmokkel Aruba (CMMA), pa combersa riba tur loke mester wordo haci pa asina CMMA, por haci su trabou debidamente.
Prome Minister a indica cu traficacion di hende ta un problema serio, y lamentablemente, na Aruba tambe nos conoce e problema aki. Pa e motibo aki, e ta di suma importancia pa comunidad semper keda alerta, y na momento cu tin un sospecho di un acto di traficacion di hende, pa meld esaki imediatamente na instancianan concerni.
Manera ta conoci, den e region Caribe, e situacion geopolitico ta pone cu hopi ta esnan cu ta desespera pa sali di nan pais, y aki ta unda esnan cu ta comete e acto baho aki, ta tuma bentaha di e situacion, sacando e personanan aki di nan pais bou promesanan falso. Na Aruba, e casonan aki ta pasa hopi den e sector di construccion, prostitucion, y trabounan domestico, na unda e personanan ta wordo treci akinan y manera nan yega ta kita nan paspoort, nan libertad, no ta duna nan oranan liber y ta pone nan traha pa poco placa.
Traficacion di hende ta un acto castigabel pa ley. P’esey ta importante pa comunidad completo ta alerta, y pa meld inmediatamente, na momento cu tin sospecho di un acto di traficacion. Unabes cu CMMA haya un melding, nan lo investiga e caso y si ta trata di traficacion, nan busca e manera pa por yuda e victima. Pa CMMA e ta importante pa sigui crea conscientisacion, y di por conta cu e sosten di comunidad na purba combati e problema serio aki.
Pa meld cualkier caso di traficacion, por haci esaki mandando un email pa [email protected], via whatsapp 5975223 of via Facebook Messenger CMMAruba, cu tur informacion cu por ta relevante.
“Aruba ta un “One Happy Island” y nos kier mantene asina. Riba e isla aki, no tin luga pa traficacion di hende, ni sclavitud moderno”, Prome Minister a expresa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio