Día 7 di April 1948 e bapor Helicon di Konink- lijke Nederlandse Stoomboot Maatschappij (KNSM) a marca historia drentando Paardenbaai di banda pabou. Anteriormente, tur bapor mester a drenta di banda pariba y sali banda pariba, pasobra e entrada di banda pabou no tabata suficiente hundo. Pa haci esaki, nan mester a draai 180° den awanan di haf, entre e waf (Cornelis Eman Kade) y e rif, un maniobra hopi dificil y peligroso cu e bapornan grandi no por a efectua. Pa acomoda e bapornan cu tabata bira mas y mas grandi, Aruba a realisa cu mester haci un trabou colossal riba Paardenbaai.
E entrada banda pabou di Paardenbaai tabata solamente 12’ (3.7 m), suficiente pa e barkitonan di pisca, pero no suficiente hundo pa e barconan di carga. E opcion logico tabata pa coba banda pabou, pero cobamento e tempo ey lo a costa mas cu gobierno tabatin pa gasta.
Despues di Guera Mundial II, Aruba a haya ayudo financiero pa haci e cambionan necesario. Na 1947 e empresa Standard Dredging Company a cuminsa coba e entrada di pabou pa eliminate e biramento di e bapornan na waf grandi. Pa dia cu Standard Dredging a caba nan trabou na 1948, henter Paardenbaai tabata 36’ (11.0 m) hundo. E entrada di Helicon 76 aña pasa a haci cu awe Aruba por ricibi e bapornan mas grandi di mundo y nos economia ta disfruta di e turismo crucero.
Cu maneho huicioso di Paaardenbaai pa mas di un siglo, a crea e fundeshi pa e turismo di Aruba, e pilar mas importante di nos economia. P’ami, e entrada di M/S Helicon 76 aña pasa ta e icono di e proceso.