Home » Minister Endy Croes: RENOBACION DI E PISTA DI PALO MARGA A INICIA

Minister Endy Croes: RENOBACION DI E PISTA DI PALO MARGA A INICIA

by Admin
0 comment 77 views

Nos ta priminti y nos ta cumpli!

ORANJESTAD: Diahuebs atardi, durante Conferencia di Prensa di Gobierno di Aruba, Minister di Enseñansa di Deporte Endy Croes haci e anuncio oficial cu dia 4 di april e trabou di renobacion di e pista di Palo Marga ta inicia. Manera ta conoci, pa mas di 10 aña Palo Marga no a haya atencion di e gobiernonan anterior y no tabata den un condicion adecua. Despues di evalua e necesidadnan cu tabatin den Palo Marga, desde aña 2023 a inicia cu e prome fase di e proyecto, unda cu a aloca 26 poste di luz, instala cabel di coriente y a construi un baki di santo na e final di pista, cual ta pa evita cualkier desgracia den caso cu break di auto faya. A inverti 450 mil florin den luz ultramoderno LED light di marca Philips. Dia 1 di juli di aña pasa a concretisa e prome fase aki, unda a cende e luznan di Palo Marga cu ta ilumina e pista desde inicio te na final di e pista. Esaki sigur ta brinda e coredonan siguridad, mirando cu nan tin un miho bista di e pista. Durante e ceremonia di One Cool Summer, e mandatario di Deporte a haci un promesa cu lo sigui cu e di dos fase di renobacion di Palo Marga, esta “recap” e pista completo di Palo Marga pa cumpli cu e standardnan internacional. Pa esaki, a trece Sr. Kurt Johnson di Total Venue Concepts, un profesional den e preparacion di pista di drag racing na Merca. Lo uza un mix special pa e pista, esta “race quality asphalt”. A percura pa e fondonan yega pa realisa e proyecto di Palo Marga, pa cumpli cu e condicionnan internacional y tin un pista certifica pa e proximo 15 añanan. Na Aruba no tin tur ekipo, sinembargo a traves di e contactonan di Sr. Kurt Johnson a ricibi un oferta adicional pa complimenta e proyecto aki. Ademas di esaki, AWM lo trece un experto di Hulanda pa concretisa riba nivel di millimeter con nan lo basha e pista. Ta planifica pa termina e proyecto di renobacion di e pista di Palo Marga den seis (6) of ocho (8) siman.
Durante e ceremonia Sr. Richard Every di ABM a expresa cu e fecha 3 di april ta hopi importante pa mundo di drag race na Aruba. Sr. Every a sigui bisa cu porfin e dia a yega cu lo renoba e pista, na unda cu di awo padilanti progreso so ta bay tin p’e deporte di drag race. Sr. Every a gradici Minister Endy Croes, Ministerio di Deporte y tur stakeholder cu a yuda cu e prome fase, esta e 26 poste di luz cu a keda finalisa y awo ta cla pa inicia cu di dos fase 2, esta “recap” e pista.
Minister Endy Croes a señala un publicacion den e corant Amigo di Aruba, di 41 aña pasa, riba e fecha 23 di april 1983, cu durante e apertura di Palo Marga e comision e tempo ey, a remarca cu ta imposibel pa gradici tur persona cu a contribui den realisacion di e proyecto. Esaki ta duna un indicacion cu ta hopi hende a pone cabes y traha hunto pa logra e proyecto aki. Sinembargo, nan a haci un excepcion y a gradici Arubaanse Bestuurscollege, consehero general Betico Croes (feliz memoria) y personal di Arubaanse Wegenbouw pa nan gran apoyo den e proyecto.

Despues di e ceremonia, Minister Endy Croes den un auto dragster a realisa e ultimo careda riba e pista pa asina clausura oficialmente esaki pa e trabounan di renobacion por inicia. Despues a tuma luga e “groundbreaking” simbolicamente duna inicio na e trabou di renobacion di e pista.
Por ultimo, Minister Endy Croes ta gradici Gobierno di Aruba, Lotto pa Deporte y tur stakeholder cu ta carga e proyecto aki. Tambe, e mandatario di Deporte ta gradici e comision, directiva di ABM, DOW, AWM, C2, Ministerio di Deporte y e coredonan pa e compresion. Alabes, ta felicita e mundo di dragrace. Corda laga nos cuida e pista aki pa asina nos por uz’e pa hopi aña. “Ta nos compromiso pa contribui den e desaroyo di deporte di Aruba y Gobierno di Aruba ta invertiendo den deporte pa bienestar di tur deportista”, Minister Endy Croes a conclui.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio