ORANJESTAD – Durante e biahe pa Corsou di Prome Minister Evelyn Wever-Croes y Minister di Finansa Xiomara Maduro pa trata e tema di ENNIA, nan a wordo invita den e programa “Prome Enkuentro” di e canal di television ‘Nos Pais Television’. E programa aki ta wordo conduci pa e conocido Mavis Albertina, un persona hopi keri y admira na Aruba. Akinan a comparti momentonan masha agradabel y durante esaki a responde varios pregunta.
Iniciando e programa a papia riba e motibo di e bishita na Corsou di e delegacion di Gobierno di Aruba. Prome Minister y Minister di Finansa Xiomara Maduro a duna un splikacion cortico riba e tema di ENNIA y e reunionan cu nan lo tin cu entre otro Prome Minister y Minister di Finansa di Corsou. Despues a sigui combersa riba e bishita recien na Aruba di Secretario di Estado van Huffelen unda Prome Minister a indica cu esaki tawata uno positivo y cu ainda Aruba ta na mesa cu Hulanda pa e refinanciamento di e boete rente di 6.9%.
A papia riba tema di turismo y e posibilidadnan di e diversificacion di e economia di Aruba, entre otro riba e tereno di energia, green hydrogen y agricultura. E lema hopi den noticia ultimamente “No More Hotels” tambe a bin dilanti, unda Prome Minister a bisa di ta sigui sostene esaki 100% y a splika un poco e tema di e 7000 camber di hotel otorga pa e gobierno anterior y cu Gabinete Wever-Croes a logra baha esaki na 1200 camber pero ainda constantemente ta den corte pa baha esaki mas.
Señora Albertina a tuma e oportunidad pa felicita Prome Minister cu e presidencia di OCTA y pa e 14,5 miyon cu Aruba a ricibi y eynan Prome Minister a splika un tiki di loke ta OCTA. E dos mandatarionan tambe a conta di e celebracion di e 48 aña di Aruba su Himno y Bandera y di e lema Aruba Orguyo di Nos Tur.
Durante e entrevista señora Albertina a tuma e oprortunidad expresa su satisfaccion di por a wak cu recientemente Gobierno di Aruba a decreta luna di April como luna Nacional di Conscientisacion Contra Abuso di Mucha y Prome Minister a splika riba kico tur Gobierno di Aruba a haci y ta haciendo riba tereno di entre otro conscientisacion, prevencion, cuido di victima.
Ya cerando e entrevista Prome Minister mescos cu Minister Xiomara Maduro a gradici señora Mavis Albertina pa e oportunidad y Prome Minister a expresa cu semper ta dushi pa por saluda e pueblo di Corsou y cu semper Aruba y Corsou lo sigui yuda otro ya cu hunto semper por logra mas.