ORANJESTAD, Aruba 26 Maart 2024: Tur aña riba e di tres diamars di luna di maart rond di mundo ta celebra Dia Internacional di Trahado Social. E dia ta brinda e oportunidad pa tur Trahado Social y otro personanan cu ta traha den e sector social pa celebra nan logronan y tambe pa crea conciencia di e rol importante cu Trabou Social ta hunga den bida di nos muchanan, famianan y otro comunidadnan den nos sociedad.
E dia aki kier pone atencion na e necesidad pa sigui planea, desaroya y sostene e profesion y e sector social, asina parlamentario di Fraccion di MEP, Ricky Hoek a declara.
Tema anual
El a sigui bisa cu e tema di e aña aki ta “Buen Vivir: Shared Future for Transformative Change” (Buen Vivir: Un futuro comparti pa un cambio transformativo). E tema ta referi na e necesidad cu tin pa e Trahadonan Social adopta metodonan innovado di intervencion cu ta wordo lidera/guia door di e comunidad. Y tambe cu e metodonan ta basa riba e sabiduria di e pueblo y e coexistencia harmonioso cu naturaleza.
E importancia di Trabou Social
Trabou Social ta trece un cantidad signicativo di balor agrega tanto na e sociedad, e individuo y diferente comunidadnan. Aki lo elabora riba algun contribucionnan clave:
– Empodera individuo y famianan: e Trahado Social ta empodera e individuo(nan) pa surpasa tur reto, mehora nan bienestar y logra nan metanan.
– Boga pa husticia social: Trahadonan Social ta campeonnan den husticia social. Nan ta bringa contra di desigualdad y discriminacion. Nan ta boga pa maneho- y programanan cu ta sigura cu tur hende tin acceso na oportunidadnan y recursonan.
– Proteha e populacion vulnerabel: e Trahado Social hopi biaha ta traha na e front line caminda e ta proteha esnan vulnerabel den sociedad entre otro mucha, adulto mayor y persona cu limitacion. Nan ta sigura cu e individuonan aki tin acceso na e servicionan esencial y cu nan ta protehi for di tur daño.
– Banda di e trabounan importante di intervencion personal cu e Trahado Social ta brinda, nan tin un aporte mas amplio pa e pais.
E Trahado Social ta contribui na desaroya un maneho social cu ta mustra e necesidadnan den comunidad y e intervencionnan necesario. Tambe prevencion ta un punto cardinal di atencion, caminda e Trahado Social ta señala problemanan na un fase trempan, prome cu nan escala den problemanan mas grandi.
Den realidad, e trabou di un Trahado Social ta e weso di lomba di un red social fuerte den comunidad. Nan ta sigura cu tur persona tin acceso na e recursonan y ta sostene nan pa yega na un bida saludabel, logrando metanan y un bida husto. Un pabien na tur nos Trahadonan Social riba nan dia, Parlamentario Hoek a finalisa bisando.