Un bonnochi cordial na tur presente,
Ta un placer pa awe na vispera di Dia Mundial di Teatro dedica algun palabra na tur instancia y persona cu ta haci e arte di teatro posibel.
E arte di Teatro tin e don pa laga nos brasa nos diferencia y laga nos sinti nos forza universal.
Teatro ta un medio di comunicacion, expresion y entretenimiento importante pa transmiti y fomenta paz.
Ta danki na e esfuerso di cada artista y atraves di nan creatividad, nan ta recorda nos di nos bunitesa como ser humano unico y alaves diferente cu asina nos subi tarima den arte nos ta uni den un forza universal cu ta trece paz den nos curason y trankilidad den nos mente.
E mensahe di e aña aki ta den man di e escritor y dramaturgo Jon Fosse di Norwega cu ta splica na un manera bunita cu aunque tur hende ta unico, nos tur ta mescos. No ta importa nos color, nos fashi, e pais na unda nos a nace, nos religion etc, den nos ser nos tur ta mescos.
Na Aruba ta 20 aña caba cu nos ta para keto pa celebra e hecho cu e arte di teatro ta bibo na nos Pais. E ta forma parti di nos cultura y pa e motibo aki ta importante pa e por ricibi nos sosten y apoyo. Den esaki ta crucial pa den comunidad mas hende wordo haci consciente di e importancia di e forma di arte aki y nos mester busca mas avenida pa crea e sosten cu ta necesario pa e arte di teatro keda florece pa eternidad.
Den cuadro di e trabounan pa introduci Educacion Cultural na scol, nos ta sondea con pa apoya e arte di teatro na miho manera. A tene ronda di consulta pa asina ta bon informa di e deseonan pa asina por yega na solucion cu ta wordo carga pa e comunidad di teatro na nos Pais. Pues nos ta riba dje.
Pa finalisa mi kier gradici tur persona y instancia cu ta dedica na duna bida na e arte di teatro na Aruba. Ban admira, aplaudi y brinda sosten na nos talentonan local cu ta domina e arte di teatro na Aruba. Masha danki y pabien di awe caba cu e celebracion di Dia Mundial di Teatro.
Please no lubida, cu teatro tin e don pa laga nos brasa nos diferencia y laga nos sinti nos forza universal.