Desde 2019 131 a incorpora un Conseho Hubenil den nan organisacion. E Conseho Hubenil di 131 su tarea ta pa primeramente duna conseho solicita y no solicita na e organisacion. Tambe nan ta duna conseho ariba proyectonan di 131, prome cu nan ser implementa. E Conseho Hubenil di 131 ta duna e organisacion un bista cu precision di kiko ta pasando bao di mucha y hoben y pakiko.
E Conseho Hubenil ta consisti di 5 hoben, mucha muher y mucha homber, entre e edad nan di 11 pa 24 aña. E personal di 131 ta den contacto estrecho cu e Conseho Hubenil pa asina aki por scucha kiko segun nan ta e preocupacionan y problemanan bao di nos muchanan y hobenan.
Ariba 28 di febrauri ultimo e Conseho Hubenil a haci un bishita na Parlamento di Aruba. Durante e bishita nan a participa den un reunion cu diferente parlamentarionan. Durante e reunion tawata presente e fraccionan di Raiz, Mep, Mas, Accion 21, Parlamentario Independiente Gerlien Croes y Avp.
Durante e reunion e director di 131 a duna informacion tocante e tarea di e Conseho Hubenil, y a contesta diferente pregunta di diferente parlamentario encuanto e Conseho Hubenil, 131 y desaroyo y problemanan bao di e muchanan y hobenan na Aruba. Tambe e miembronan di e Conseho Hubenil a presenta diferente desaroyo y inquietud bao di nos muchanan y hobenan di Aruba, a haci diferente pregunta na e parlamentarionan y a contesta diferente di nan preguntanan.
131 y e Conseho Hubenil di 131 kier a gradici Parlamento di Aruba pa ricibi nos y pa e momento di intercambio durante e reunion.
Pa mas informacion tocante e Conseho Hubenil di 131 por tuma contacto via nos website: 131.aw, Instagram: Instagram: 131aruba, facebook: https://www.facebook.com/aruba.131, email: [email protected] of telefon 5886138/ 5884011.
