Home » Protesta Medioambiental a interumpi speech di Minister President durante Dia di Himno y Bandera 

Protesta Medioambiental a interumpi speech di Minister President durante Dia di Himno y Bandera 

by Admin
0 comment 183 views

 

 

Dia 18 di Maart, un grupo di activista di medioambiente anto miembro nan di pueblo cu ta concerni a interumpi e speech oficial di Minister President Evelyn Wever-Croes pa trece diferente mensahe dilante tocante e futuro di nos isla, su naturalesa, nos economia y e  nos herencia cultural.

Locual cu e grupo kier trece dilanti ta cu nan lo kier wak gobierno y e lider nan den parlamento pa duna naturalesa un prioridad, paso Aruba ta den un crisis di medioambiente y lo mester accion, urgencia, y cambio di systema pa ta mas sostenibel. E grupo tambe kier a trece dilanti cu si nos sigui asina y no cambia systema, eventualmente systema ecologica, social y economico lo cay den otro.

E grupo a dicidi di haci e protesta aki dia di 18 di Maart, paso nan tawata kier a recorda tur hende cu e dia historico y nacional di 18 di Maart su raiz a cuminsa como un protesta pa nos lucha pa nos independencia.

Recientemente, tawata tin un movemento den pueblo cu a cuminsa cu e lema “No More Hotels” y “Land Back”, despues di e graffiti cu a wordo pinta na diferente area nan turistico na Aruba. E movemento a haya attencion riba social media y tambe a wordo hiba internacionalmente. A mustra cu pueblo tampoco no ta mucho contento cu e cantidad di hotel nobo cu ta wordo construi na Aruba. Tambe pueblo a cuminsa ripara cu hopi tereno nan grandi cu historia archeologico di nos antepasado nan Indigena ta wordo bendi na prijs nan halto y ta wordo duna mayoria biaha na inversionista rico nan di afo. E tereno nan cu ta wordo bendi tambe ta resulta den rosamento di mondi y e habitat nan di bestia nativo y endemico di Aruba ta wordo perdi. 

Otro problema medioambiental cu ta pasando ta e RWZI cu ta overcapacita door di e volumen di desperdicio cu ta bin for di e industria di hotel y turismo. Varios biaha, local y turista nan a tuma nota cu tin un holor fuerte di awa di pos na diferente lugar nan manera Palm Beach, Eagle Beach y mas y tambe a tuma nota cu e awa di desperdicio ta drentando directamente den nos lama nan anto cu tin riesgo ariba nos salud y tambe nos naturalesa.

Siman pasa tambe tawata tin un oil spill for di e exploracion di Trinidad y Tobago cu a yega na e Noord kust di Aruba, anto esey mes ta un señal na nos gobierno pa para e contract firma di LNG (exploracion di gas na Aruba, paso e industria ey tambe tin riesgo grandi y malo pa nos medioambiente. 

Siguientemente, Aruba ta sintiendo e efecto nan di cambio di clima, paso cada aña, Departamente Meteorologico di Aruba ta bisando cu Aruba ta birando mas calor cu record den temperatura y cu temporada seco ta birando mas largo.

Importante pa bisa cu asta turista cu ta bishita Aruba pa añas largo mes ta bisando cu Aruba ta cambiando hopi mes cu e situacion di e cantidad di hotels cu lo bay bin. Paar di turista mes ta expresa cu nan no lo bin Aruba mas paso e bunitesa di Aruba su naturalesa ta desapareciendo y cu tin hopi otro destinacion cu si lo tin mas lugar cu ta balora nan naturalesa. Esaki ta mustra nos cu asta e crisis di medioambiente ta costando nos placa y ta bay tin impacto negativo ariba nos economia. 

Na fin di dia, hopi cuidadano ta precupa pa e situacion di proteccion di naturalesa y e riesgo nan di cambio di clima cu lo bay pasa na Aruba. Hopi hende ta expresa cu nan no ta contento cu e direccion cu nos ta bayendo cu nos systema, anto lo kier wak cambio di systema y cambio duradero pa nos futuro. E grupo activista di medioambiente kier a trece e mensahe di pueblo y di nos naturalesa dilanti, anto mustra gobernante nan y miembro di parlamento cu nan mester refleha y representa loke pueblo ta bisa, paso asina nos systema di democracia ta traha. E protesta ta pa exigi pa mas accion pa cambio di clima, prioridad y proteccion di nos naturalesa , preservacion di nos herencia cultural di nos antepasado Indigena y pa tin cambio di systema cu lo refleha locual pueblo kier.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio