Home » GRAN APERTURA DI BASKETBALL COURT NA VILLAGE, SAN NICOLAS

GRAN APERTURA DI BASKETBALL COURT NA VILLAGE, SAN NICOLAS

by Admin
0 comment 95 views

 

ORANJESTAD: Diabierna anochi, a tuma luga e gran apertura di Sint-Maartenstraat Basketball Court na San Nicolas. Manera ta conoci, e ultimo aña cu a renoba e cancha tabata na aña 2009 y desde e tempo ey e cancha no a haya atencion mas. Mirando e condicion deplorabel di e cancha, Minister di Deporte Endy Croes hunto cu su team a inicia cu e proyecto di renobacion di e cancha aña pasa den e luna di februari. A aloca fondo tanto di Gobierno di Aruba y Lotto pa Deporte pa renoba entre otro, e heki, vloer, ring y hut. Tambe a instala luz LED cu ta traha cu sistema solar pa tin un bon iluminacion. Minister Endy Croes hunto cu Presidente di Parlamento di Aruba mr. Edgard Vrolijk, Prome Minister di Aruba Sra. Evelyn Wever-Croes, Minister Rocco Tjon, Parlamentario Sra. Shailiny Tromp-Lee, Sra. Darlaine Guedez Erasmus, Sra. Setty Christiaans-Yarzagaray, Sr. Hendrik Tevreden y demas invitadonan special tabata presente na e apertura di e cancha di basketball na Village. Prome Minister Evelyn Wever-Croes a duna un discurso, felicitando Minister Endy Croes y su team pa e gran trabou cu nan a haci den e proyecto di renobacion di e cancha aki. Durante e ocasion special aki, a inaugura e cancha y a dedic’e na dos legendario den e deporte di basketball, esta Sr. Malary Anthony Coco “Pete”, den feliz memoria y Sr. Ricardo Cooper. Fuera di esaki, a entrega un reconocemento den nomber di Gobierno di Aruba na coach Sr. Sean Toppenberg y cuater atleta di e deporte di basketball cu a titula subcampeon den Weganan Interinsular 2024 na Boneiro. E hobennan atleta Cyondre Stennett, Danoe Gumbs, Deshon Warner y Cayden Fraser ta bishita Graf von Zinzendorf School y a laga Aruba su nomber den halto. E hobennan aki a ricibi un medaya y bala di basketball pa nan scol di Minister Endy Croes. Tambe, e comerciantenan di Promenade a uni pa regala e mucha- y hobennan di Village bala di basketball pa por sigui practica nan deporte. Despues di e ceremonia, e ekiponan di KPA y De Vuyst Impact a enfrenta otro, unda cu e ekipo di De Vuyst Impact a gana e hugada. Na final di e anochi, e banda musical Groove Masters a pone un excelente ambiente pa esnan presente cu nan exitoso repertorio. Finalmente, Minister Endy Croes a indica cu esaki sigur ta un gran logro pa e districto di San Nicolas, mirando e oportunidad cu ta brinda e mucha- y hobennan di e districto pa practica deporte y keda activo. Minister Endy Croes ta gradici Gabinete Wever-Croes II, Ministerio di Deporte, Lotto pa Deporte y tur esnan cu a contribui den e proyecto di renobacion di e cancha di basketball na Village. Pabien San Nicolas cu e gran logro aki.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio